eh, ni hok pilot??

Hye everyone! How you guys been doing? Eh eh silap intro pulok. Intro untuk blog flying yellowherbie tuh (haha naka sangat la tu. wak lawok tok jjadi).

Assalamualaikum semo!

Hoh, ni ambo sero hati sikit nih. Tidok la panas hati, tapi hati kurang senang sedikit lah pada itu hari. Seblom tuh, ambo nok tanyo blako adik kakok abe-abe ssinih. Pernah dok, oghe ggura (*bergurau) sapa demo ssero? Bukae ggura bewok, tuh tadok nok ssero hati. Gurauan hok konon nok buat naka la, tapi dio tok perasae buat demo terasa.

Ambo nih bukae jenis sensitif sangat. Tapi, oghe tough lagu mano pong, semo ado limit. Kito semo manusio kae. Bo lah. Meh denga kisoh ambo nih...

Jadi pado itu hari nyo, ambo jjupo nga family saing parents ambo. Anok-anok dio besar blako doh jugok lah. As usual, ibu ambo banggo sangat lah introduce anok dio kepado saing dio (ambo bukae nok poyo, tapi thats a fact). Kito panggil Pakcik A lah ok. Lebih kurang gini senario waktu tuh,

Mother: Nii, hok nombo duo, hok kijo pilot tuh.
Pakcik A : Oooo, hok ni ko?
Ambo: Ho, sayo, pokcik. Co-pilot jahhh. (*hulur tange nok ssalae)
Pakcik A: Ohhh, kecik saaaangat. Ghok ko bowok kapaterbe nih. Hahhahahahahhahaaa!
Ambo: He.......he.......he........he (*senyum paksa sambil bermuka spuloh sen)

Now, ambo bukae la tokleh buat ggurau. Ambo tok ssaloh ko dio pong. Its just his bad luck that he is like the thousandth person to make that joke. And selepas seribu kali, that joke not only jadi basi, tapi menusuk hati ku juga. Ambo tok tahu lah. Mungkin sebab dio over kot, siap nga pecet-pecet lengan ambo sambil buat lawok tuh. Anok-anok dio pong tersipu-sipu suko jugok.

Ho la, ambo meme kurus, tapi tidok la kurus kering supo cicok kapit ppintu. Pikir-pikir balik pong, kali pertamo ambo dengar joke ni, maso ambo mulo-mulo jjadi cadet duluh, ambo pong nok ssuko jugok oghe ggura lagu tuh nga ambo. Sure, making fun of other people is funny. Once, twice. Thrice pon okay lagi. Lepah tu gak, hmmm, you figure it out lah.

Tapi supo ambo oyak awal-awal tadi lah, ambo tok ssaloh ko Pakcik A pong. Mano dio ttahu ambo ni sapa nok jeluok doh dengar joke tuh. Dio pong, taraf pokcik, oghe tuo. Mungkin jugok dio ingat bowok kapaterbe ni, oghe hok body supo askar, body mat saleh gitu jah buleh. Not his fault at all.

Ambo nok nasihat sikit la ssini (cewahh, yellowherbie nok bui nasihaaaattt, huuu, serious siott). Emmm, demo nok ggura pasal penampilan oghe lain ko, ggura gapo-gapo ko, pikir duluh, maybe it's not funny. And kalu demo hok jadi mangsa ggura tuh, rilek jahhh. Bak kato mat pit, 'lu layan isap gam jer bebbb'. Stakat nok luoh di blog tuh okay laa (eceh ecehhhh, saaaapo eh?).

Ambo pon beringat jugok lah. Mitok maaf bbanyok ado wak saloh silap deh...

glossary for outsiders:
ghok = larat
naka = lawak
saing = kawan
jeluok = muntah secara kecil-kecilan