Thursday, December 27, 2012

Gambar dari langit...

Assalamualaikum pokcik mokcik adik kakok abe-abe..

Lamo ambo tok bowok Canon SLR ambo gi jjale. Hari tu ambo gi New Delhi, Tokyo, dan Amsterdam. Puah doh dok ambik gambar bandar dio, jadi ambo ambik gambar-gambar sambil ambo terbe. Biaso nyo, ambo upload dan bercerita di blog ambo hok satu lagi, tapi kali ni, apa lah salahnya, cerito kok bahaso kelate...


Gambar ni ambo ambik lebih kure 3000 kaki. Highway di tengoh-tengoh gambar adalah KESAS highway, menuju ke KL dari arah Klang. Tengoh-tengoh gambar ni ialah Kota Kemuning, Shah Alam.

Selisih nga pesawat B777 dari arah India, ambo pulok menuju India. Ambo 34000 kaki, dio 35000 kaki.

Nok selisih nga pesawat B747-400 pulok...

Errr, hok ni tok pasti pulok pesawat jenis ggapo...

Antara gambar paling hebat ambo pernah ambik. Tengoh-tengoh gambar ni, KLCC yang indah. Molek-molek atas KLCC, awan jo'ong. KLCC serupo torch light, suluh menembusi awan tuh. Time ni ambo terbe atas Ampang, KL.

Ni pulok alah gi Tokyo, lalu atas Ho Chi Minh, ibu negara Vietnam hok kaloh bola ppete lagi Suzuki Cup hari tu hahaha. Ambo ingat maso tu pukul 1 pagi doh, tapi bandar ni ceroh lagi...

Haaaa, Mount Fuji, gunung tertinggi di Jepun. Terletak kira-kira 100km dari barat Tokyo, gunung ni tinggi dio 12400 kaki. Eh, tinggi Kinabalu lagi deh? Tapi gunung ni meme buat ambo terliur. Demo tok napok supo aiskrim vanila ko?
Ni ambo zoom ddekat sikit. Last skali gunung berapi ni meletup tahun 1707, tu ya jjadi lagu tu tuh puncak dio. Supo aiskrim keno kekoh sikit deh.

Lapangan Terbang Antarabangsa Nagoya. Kalu terbe dari Tokyo menuju KL, lalu bandaraya Nagoya.

Taiwan. Bukae Tawang, Bachok. Tapi oghe kelate sebut duo-duo tu nok dekat. Taiwae, Tawae.

Alah gi Amsterdam pulok ni. Berlepas pukol 12 malam, banyok lagi lampu tok tutup di KL. Blur sikit gambar ni tapi ni sebenarnyo adalah Kota Kemuning dan Putraheights.

Acu demo tengok gambar hok pertama tadi. Serupo jah ni, cumo hok ni malam. Tengoh-tengoh adalah Kota Kemuning, highway tu KESAS. OK ambo letok skali lagi untuk demo buat perbandingan...

Samo deh? Kalu tengok KESAS highway tu, napok dio bucit skit di satu bahagian. TOL tu. TOLOL.

Alah nok gi Amsterdam, Netherland, lalu negara Tehran. Ni bandaraya Masshad dari ketinggian 36000 kaki.

Masshad. Tengoh-tengoh tu lampu terang benderang deh. Mesti pusat bandar dio ambo raso..

Sebenarnyo ambo nok ambik gambar bintang ni. Kalu sapo-sapo minat astronomi, ssini demo buleh napok constallation Orion the Hunter. Hok ado tigo butir jjujuk tu. Alek kanan skit hok terang tu bintang Sirius, bintang paling terang di langit. Bandaraya bbowoh tok napok sebab awan tebal, tapi maso ni di Rostov-na-donu, negara Russia.

Maso ni di negara Belarus. Bandar bbowoh adalah Minsk. Masih napok Orion the Hunter dan Sirius..

Alah kelik dari Amsterdam pulok. Di Ukraine, bandar Donetsk. Sapo-sapo minat bola mesti kenal pasukan Shakhtar Donetsk. Ni la bandar dio, tapi tok napok sangat sebab salji tebal. Putih saujana mata memandang..

Mmutih habih. Kalu demo suko sejuk benci panas negara kito, nasihat ambo, syukur laaa nga suhu di Malaysia nih. Huiii, kalu sejuk tu sejuk sungguh weh. Nok bowok keto pong payoh, salji penuh atah jalae.

OK la adik kakok. Stakat ni dulu. Sory takdok cerito gong nok oyak. Hanya gambar-gambar yang indah. Cewah, koya biso ambik gambar. Tapi meme pong. Ingat sene ko nok setting camera nok buleh gambar supo ambo post ni. Hehe, koya pulok. Tapi meme hebat deh. Hehe.

Bo lah. Start doh ngarut. Assalamualaikum, Selamat Tahun Baru :)

Monday, November 19, 2012

Kambing

Assalamualaikum pokcik mokcik adik kakok abe-abe..

Pada suatu masa dahulu, ado soghe manusio ni, kito bui dio namo Hanaffi la deh (tiada kaitan dengan yang hidup atau yang telah mati). Sene nok tulis, kito panggil dio Napi sudoh, ok? Jadi si Napi ni ado ramai anok. Duo belas oghe anok. Sedozen anok Napi nih. Bini satu jah.

Napi ni, adik kakok, hidup dio tidok la daif sangat, tidok mewoh sangat. Dio nga anok sedozen dan bini satu tinggal di satu kampung di timur Malaya. Rumoh kayu. Bahagia. Satu jah masaalah problem Napi ni.

Anok buwah (buas).

Bukae anok buoh. Anok buwah. Buwah ni, oghe kelate kato, anok hok tok jjurus. Tok panda dok diam. Aloh laaaaa adik kakok, buwah sunggoh laaaa anok Napi ni. Kito kalu soghe anok hok buwah pong pening ppalo doh. Nih, duo belas anok dio. Buwah buwah belako. Lopat gedu gede atah rumoh kayu Napi. Serabut perut laaaa Napi.

Napi pong gi jjupo tok bomoh.

Bowok tu gak si Napi, tujoh ketul hati ayam, tujuh kuku kambing, tujuh gguning rumput cerut. Tok bomoh mitok sebagai pengeras. Duduk la Encik Hanaffi berdepan tok bomoh. Panjang lebar dio cerito kepada tok bomoh. Lepas habih cerito dio, tok bomoh tidok pulok tawarkan ubat. Takdok jugok hantu untuk control anok-anok Napi. Hanya satu nasihat...

"Mung kelik drumoh, aku nok mung bowok kambing-kambing mung masuk dalae rumoh. Hidup lah mung, bini mung, anok-anok mung, nga kambing-kambing mung"

Walaupun pelik nga arahan tok bomoh, Napi tetap akur. Sapa jah rumoh dio, Napi igak kambing-kambing belaan dio, lalu dio heret bowok masuk dalae rumoh. Seminggu Napi hidup nga anok bini and kambing dio. Hari ke-8, habis lah kesabaran Napi. Ho la adik kakok, kambing berok kokse, pah lopak atah lemari, tende mejo makae pulok. Napi pong gi jupo tok bomoh lagi.

"Tulong laaaaa tok bomohhhhh, nok gilo ssero hidup lagu ni. Bakpo ya tok bomoh buat sayo koho gilo?", luah Napi kepada tok bomoh.

Kato nyo tok bomoh, " Baik lah, loni, aku nok mung kelik rumoh, hambat kambing-kambing tubek rumoh"

Napi pong kelik la rumoh, dan buat sepertimana disuruh tok bomoh. Seminggu lepah tu, Napi gi jupo tok bomoh lagi.

" Aloh lego nyoooooo hidup ambo tok bomoh! Terimo kasih laaaaa tok bomoh, ambo sero ambo la oghe paling sene hati di dunio ni!!"

Maka dengan itu, selesai lah masalah Napi. Padahal anok-anok Napi tetap buwah serupo skalo...

P/S cerito dari papa ambo kepada anok-anok maso ambo kecik dulu.

Wednesday, September 26, 2012

nawok sunat

Assalamualaikum pokcik mokcik adik kakok abe abe..

Ambo baru ado cerito nok tulih. Tu ya tok update lamo tu. Sebab takdok cerito. Tapi ni baru ado satu kesoh menarik, molek lah untuk hiburan, molek jugok untuk di jadikan teladan...

Ambo ni, as all of you know, bertugas sebagai juruterbang. Kijo pilot ni, demo tahu deh, keno la ado lesen. Lesen pilot ni keno renew setahun sekali. Lepas buat medical check up, keno gi Putrajaya untuk 'cop' lesen. Jadi apabilo gi pejabat kerajaan di Putrajaya tu, sokmo la jjupo saing-saing. Hari tu ambo jjupo senior ambo, dio hok mari tegur ambo.

Maso tu adik kakok, ambo dok tunggu nombor ambo. Dari jauh ambo napok saing ambo ni mari. Dio captain hok dulu fly samo airlines nga ambo, tapi telah berhijrah gi airlines kaler merah sikit. Dulu, ambo kenal dio pong gitu-gitu jah, tidok lah rapat sangat pong. Tapi ambo kelih dio mari dekat ambo, senyum lebar, dari jauh angkat tange nok shake hand nga ambo..

"Heyyyyy how are you bro, lama tak jumpa! Your dad sihat lagi? Dia banyak fly lagi ke, or dah retire?"

Terpinga-pinga ambo, ayoh ambo bukae kijo pilot adik kakok weh! Ssamad ni silap oghe doh lah. Tapi dio yakin, jadi ambo takdok pilihan lain. Nawok sunat sudoh. Layan jah la. Bukae ggapo, siye sunggoh ko dio, sebab senyum lebar gih dio shake hand nga ambo, erat molek dio genggam tange ambo, pahtu siap tepuk atas belake ambo lagi. Kalu ambo oyak dio silap oghe, tidok ko malu ko dio, lebih-lebih lagi gege doh dio kecek nga ambo sapa oghe pakat kelih..

"Errr, sihat, dia sihat je. Eh, you banyak fly mana skarang ni?", ambo try tukar topic konon.

"Macam biasa la, takkan tak tau. Eh kirim salam kat your dad ok. Dia ada kat rumah ke?"

Wok alohhhh, nok kecek pasal pok kito jugok! Doh la kito nnawok doh. Bokali dio baik benar nga ayoh ambo hok kijo "pilot" tu. Maso tu jugok laaa adik kakok, ado soghe lagi senior pilot masuk pejabat. Kami bertiga pong bersalaman lah.

"Yo, bro, you ingat dia ni kan, ayah dia yang veeeeery senior pilot kita dulu", dio oyak ko saing dio. Mapuh doh aku skali ni, ambo kato dalae hati. Situasi ni koho berat ni adik kakok. Bertambah la masalah ambo, apobilo saing dio tanyo,

"Oh ye ke? Sapa nama your father?"

Aaaaaaaaa suddddoh doh laaaahhhhhh! Sudoh sudoh sudoh sudoh sudddddohhhhhhh!!!! Eh, kalu demo dalae situasi ambo, demo buat lagu mano heh? Nok oyak dio ssaloh oghe? Pah sakni bakpo tok oyak awal-awal nyoh! Tu la mungggg, nok nawok sunat sangat. Tapi kalu oyak awal-awal tadi kae, malu senior ambo tu pulok. Dio pong satu, yakin bedo'oh! So, sapo namo ayoh ambo ni, nok nawok ggapo lagi? Dio ingat ayoh ambo sapo?

Ala, biasa la, zaman teknologi canggih ni sene jah nok wak lolok sibuk. Wak tubik handphone la. Handphone konon silent, tok ringing, tapi ado oghe call la kononnnn...

"Eh kejap captain, my wife called. Excuse me ye.."

Bini ambo jugok hok jadi penyelamat. Walapong dio tok tahu. Hm, lepah "kecek" nga bini ambo, ambo pong gi nnusuk di toilet slaluh la. Lari wei, lari. Agok-agok dio tukar topic doh, baru tubek toilet. Mujur duo oghe tu meme dok discuss pasal bendo lain doh maso ambo kecek nga dio smula. Tok ingat doh ko pok kito hok kijo pilot tuh.

Ko dio baru teringat ambo ni bukae anok pilot?


Wednesday, June 27, 2012

nate anying gilo...

Assalamualaikum pokcik mokcik adik kakok abe abe...

Seperti yang dijanjikan, ni cerito ambo keno hambat ko menate hanying. Sekali lagi ambo nok peringat ko adik kakok, post ni banyok nyupoh. Sebab sambil ambo nok ssapa cerito ni, ambo nok melepaskan geram ambo keno hambat. Nok cari anying tu nok katok mapuh tapi tok jjupo doh.

Ambo sejak kebelakangan ni meme amal gaya hidup sihat. Pagi-pagi lepah subuh ambo hungga sikit-sikit. Letih hungga, ambo jogging. Letih jogging, jalae kaki. Sokmo nyo hungga 5 minit, jogging 10 minit pah jalae kaki 30 minit. Pah oyak ko oghe ambo buleh hungga 45 minit. Blawok sunggoh, deh?

Jadi al-kisahnya, suatu pagi tu ambo hungga di kawasan perumahan dekat apartment ambo. Sokmo nyo hungga dekat taman permainan jah tapi hari tu ambo raso "adventurous" sikit. Tapi sapa loni ambo nyesal gi lari ssitu. Sapa di satu lorong perumahan tu, ambo pong kona la masuk lorong tu. Di satu sudut pandangan mato ambo, ado anying besar dok bowoh van putih. Kami bertentang mata...

Anying ni, adik kakok, pantang kalu kelih manusio berlari. Kalu kito jalae buat tok tahu, takpo. Tapi kalu kito dok hungga, mesti dio nok hambat. Ouhhhhh derassss ambo lari pagi tu adik kakokkkkk! Maso tu ado jugok terlintas di fikiran ambo, nok jerkoh ko, nok lari? Ado jugok anying hok konon bekeng tapi jerkoh skali, senyap ttipah.

Tapi kalu dio tidok takut ambo jerkoh, lagu mano? Hayun kaki nok sepak pon, takdok pasal-pasal keno kekoh di buku lali. Jadi ambo ambil keputusan untuk lari. Kecik-kecik dulu ambo ingat nasihat ayoh ambo, "oghe tuo kato kalu keno hambat ko anying, baco ayat Tabbat yada". Aiiii, jolo ko anying takut ko 'Tabbat yada'. Pah, maso hungga tok kae nok nnepik,

TABBAT YADAAAA ABEE LAHABIN WATAB!!!

Bukae ambo nok perkecilkan ayat suci al-Quran, tapi tok silap ambo surah tu cerito Abu Lahab keno seksa. Tok tahu lah apo kaitan nga anying. Di sebabkan ambo ragu-ragu jadi ambo baco jugok la dalae hati. Tapi tidok la sapa nnepik ayat tu kuat-kuat..

Belum sempat ambo habih baco ayat tu, ambo napok ado satu kereta ni parking tepi jalae. Ambo tok ingat kereta ggapo tapi bonet dio rendoh, bumbung dio tinggi. Ambo pong lopat sekuat hati naik atah bonet pah ukah atah bumbung kereto tuh. Anying tu dok nyalok dari bowoh. Doh anying tu tokleh mari dekat ko ambo, tok ingat abih doh laaaa ayat-ayat suci. Sakni malu nok nnepik ayat suci, tapi nok nnepik supoh seranoh ko anying takpo pulok.

Habih tubik segalo perkataan supoh dari mulut ambo. "Nate hanying gilo baso babi nate hanying ni bodo takdok otok baso gilo cih menate lutong hudoh..." ambo ssero seumur hidup ambo tok rajin lagi ambo nyupoh sebanyok maso tu. Demo raso ado effect dok di anying tu? Takdok pong. Dok nyalok supo anying gilo jah la. Maso tu pulok awal pagi, pukol 7 kot, jadi kereta hok lalu pong sikit.

Ado mokcik bowok kereto lalu depe ambo. Dio tengok ambo dok atah bumbung kereto, doh la ambo ppeluh pela. Ambo tok ssaloh ko dio kalu dio pikir ambo oghe gilo. Lambai tu gak kito mitok tulong, tapi koho derah ado dio teke minyok. Ambo ssero 10 minit jugok la dok ccokoh ssitu. Pahtu anying tu pong gi. Terjun ambo dari bumbung kereto tu, dio napok ambo, pah mari hambat lagi!

Tapi kali ni jarok ambo nga dio jauh doh sikit jadi dio tok hambat lamo. Huiiiii lego maso tu adik kakok, raso supo terlepas dari tali hukuman tali gantung! Tapi maroh sunggoh ambo ko anying liar gilo tu. Pete tu ambo ado la gi cari nga kereto, kayu baseball menjadi peneman. Tapi panje umor anying tu, sapa ko hari ni ambo tok jjupo balik.

Mitok maaf bbanyok pencinta binatang, tapi kalu ambo jjupo tobat ambo katok mapuh.

Friday, June 22, 2012

Tunggu sekejap

Assalamualaikum pokcik mokcik adik kakok abe abe...

Eh mitok maaf bbanyok deh lamo tok update. Laptop punoh. Nok update paka ipad tok reti. Ni paka handphone jah. Ado ko oghe update paka handphone? Susoh tahu dok. Ni pong bukae nok update sangat. Nok jenguk and nok oyak mitok maaf jah. Bukae senyap lamo sebab tokse blogging doh.

Nati ado laptop/PC ambo oyak satu cerito. Cerito ambo keno hambak. Keno hambak ko menate hanying. Nate sunggoh. Mitok maaf ambo nyupoh tapi murih sungguh nah ambo ko hanying gilo tu. Nok oyak awal-awal, cerito tu penuh nga nyupoh. Jadi adik-adik, sila tutup telinga bilo baco post tu. Eh, tutup telingo takdok guno. Tutup mato lah. Budok-budok tokleh baco. 18 NK. (nyupoh kuat).

Stay tuned. Sekian.

Thursday, May 3, 2012

Kucing

Assalamualaikum pokcik mokcik adik kakok abe-abe..

Anda semua sehat blako? Ambo gak rindu suuuuungguh ko pokcik mokcik adik kakok abe abe readers blog ambo. Kiro post kali ni serupo Jejak Kasih lah, buleh? Alohlohlohlohloh sayae tu gak ambo ko demo demo. Ambo ni, adik kakok, meme tokleh stop lah blogging. Gatal tu gak jari jemari ambo duo tigo bulae ni. Gatal nok nnulih, bukae gatal kok mugo laing, haish!

Dulu ambo kato tokleh nnulih ngarut blogging doh. Ho la, maso tu kkejut kak loh adik kakok weh. Tapi ambo sebenar tidok la berniat nok tutup terus. Kiro nyo ambo nok 'lay low' semeta la. Ni lamo doh berlalu, ah, mapuh gi lah, aku nok start balik. Tok lamo lagi ambo mungkin kembalikan address lamo iaitu ketokurokuning. Ambo tukar jadi kurokuning tu sebab nok lay low la konon. Tapi ni start balik, elok lah jjadi ketokurokuning semula. Bilo? Bilo demo tok jjupo address kurokuning. Kalu takdok hok ni, try namo lamo ok sayang?

So, apa cer? Cer ambo? Banyok cer naka dan cer tolo ambo. Tapi kiro basi doh la, sebab ambo tok blog slaluh. Tapi pete sakni ado jugok la satu tragedi jjadi ko ambo. Tragedi tolo. Bakpo tolo? Gak baco lah nok tahu gak..

Ambo pete sakni ni adik kakok, gi jogging. Riadah skit. Ambo ni kurus jah tapi gak hudoh benar gih kalu tange halus perut bucit. Perut ambo tidok bucit, tapi kalu tidok hungga gak, bucit la. Ambo hungga keliling condo jah. Maso hungga tu adik kakok, ambo tengok budok soghe nih dok pege kucing. Budok jatae, umor ado la 5 tahun. Kemah keming dio pege kucing tu. Ambo biar jah. Next round, sapa tempat budok tu lagi. Masih pege kucing.

Ambo tengok nayo molek kucing tu. Dio khejung habih gheng gih nate kucing tuh. Tapi dio bukae niat nok wak nayo. Sebab sambil dio cekik tekok kucing tu, muko dio gesel nga muko kucing..

"mmmmm saaaaayang cat. Saaaaayang cat ni. Comel nyierrrr cat ni, saaaaayang sangat-sangat"

Cat nyo ssembul butir mato doh. Jjelir 2 inci doh lidoh cat. Aku sero tidok lamo lagi oksigen tok sapa ko otok cat ni. Ambo pong gi dekat budok tu. Kelih sekeliling, takdok pong oghe dewasa hok jago dio. Tapi biaso jah gini, sebab dalae condo.

"Err, dik, abang tengok kesian sangat kat cat adik ni. Sakit dia tu. Bagi abang jap boleh?", ambo oyak ko budok tu. Dio kelih ko ambo. Kkejut jugok napok muko dio, ado oghe tok kenal tibo-tibo mari tegur.

"Ini cat saye lah. Sukati saye lah. Nak bagi abang buat apa?", dio ttepik ko ambo. Ye adik kakok, ttepik.

Budok ni nok keno jetik kakku ni. Silap hari bulae aku bui nnipah sbutir baru tahu. Kecik-kecik panda nnepik ko oghe. Sabar, sabar. Bokali mok ayoh budok ni ajar dio nnepik kali ado strangers tegur. Ambo berlembut lagi...

"Dik, camni la, abang nak tengok cat adik lompat-lompat boleh?"

Kali ni dio dengar. Dio pong letok kucing tu atas rumput. Hoh, lepas tu gaaaak, lari celida la wei kucing tu. Lari supo tok cukup tanoh gih. Ho la mugo nok mapuh doh sakni keno cekik. Budok tu kelih ko ambo. Mato dio berair. Mulut dio tutup rapat. Ah sudoh doh la.

"Abang la ni! Tengok, cat saya dah lari. Abang la nni huaaaaaaaaaa!!!!", dio lari menuju lift condo.

Ambo, dengan penuh tanggung jawab nye, pon lari jugok ko blok ambo (blok lain). Mano ttahu pok budok tu oghe gedebe. Keno jetik telingo tok ppasa. Tobat ambo tokse lari keliling blok 30 hari.

Tuesday, April 17, 2012

Ado lagi?

Assalamualaikum pokcik mokcik adik kakok abe abe..

Ambo nok tahu sikit jah. Ado lagi ko hok mari di blog ambo hok telah pon bertukar alamat ni? Ramai lagi ko dok berharap? Ambo puah la kalu tok blogging. Tapi kae blogging kae nyo murih kokre pulok. Ngaaaaaano eh?