Stoking

Assalamualaikum buat ke sekian kali pokcik mokcik, adik kakok, abe-abe...

Hari rabu lepah, ambo berado di Paris pulok. Bertugas lah. Ambo, bilo gi bertugas luar negaro, supo oghe laing jugok, packing baju sluar berus gigi dan segalo lah. Tugas bini kesayangan ambo lah packing semo tu. Tapi hari tu, dio tidok berapo segar sangat. Jadi apabilo ambo keno kemas barang-barang sediri, kekok la wei jadi nyo. Ho la mugo beso oghe jong packing sokmo.

Terumbang-ambing lah beg ambo, penuh nga pakaian-pakaian hok ambo pakat humban masuk lagu tu jah.

Fast forward kisoh ni, selamat sapa lah ambo di Pariiiiiiiiiiiiiiis. Apobilo sapa Paris, ho lah, ambo bukok lah beg ambo tuh, nok guno lah bendo-bendo hok ambo pack seblom tu. Everything turns out fine. Alhamdulillah, ado belako bendo hok ambo perlu.

Hari nok fly balik ko KL......

Bersiap sedia lah ambo, paka uniform lengkap-lengkap (aaa kali ni ambo ingat paka kasut la). Acuuuuu jah ambo nok seluk kaki masuk stoking..... yaakkk... aaaa, stoking ssoyok la pulokkkk. Beci bena paka stoking hok ssoyok, maso jjalae gak dok raso jari kaki sentuh kulit kasut! Ah, biar lah, nok buat lagu mano. Nok paka stoking hok seblom tuh, busuk doh. Koyak pon, koyak lahh.

Semo berjalan lancar, takdok masaloh. Tapi tidok selama-lamanya. Saaaapa di "security checks", semo crew beratur. Tempat hok keno x-ray beg, check poket tu lah. Ambo beratur, dok tengoh-tengoh. Tibo-tibo, ambo tengok crew depe tu, dio pecat kasut dio. Kasut pong polis tu suruh x-ray jugok!

Haaaaaa beraaaaaaat, padae doh la kali ni akuuuuu!!!!! Mapuh la kali ni mapuh mapuh!!!

Menyupoh-nyupoh ambo dalae hati ambo ko polis-polis french tuh. Skalo tadok suruh pecat kasut ponggg. Aku doh la stoking sexy, napok ibu jari kaki niiii. Ambo pong slow-slow kuis kaki ambo. Tujuan? Nok bagi hujung kaki ambo tok masuk rapat dalae stoking. Supo paka longgar ggituh. Konon idea bijok la, tokse bagi napok stoking ado lubang.

aaah, ado pulokk stewardes gi tegur, "you, stoking you nape you pakai camtu you?"

Mok nenek sunggoh you just mind your own business can you!