Sunday, June 20, 2010

Hero MRT

Assalamualaikum pokcik mokcik adik kakok abe abe....

Ambo di Taipei ni, negaro Taiwan. Hok wokyoh nga sa'id kato Tawae, ttukar nga Tawang, Bachok. Tolo sunggoh duo ekor tuh. Lamo jugok ambo dok sini. Puas dok di bilik, ambo tubek bbandar. Naik la keretapi ssinih, oghe Taiwan panggil MRT. Kemarin ambo tubek gi night market, pukol 11 baru kelik, naik MRT jugok.

Gak kemarin nyo hari Sabtu. Penuh la menasio dalae gerabak MRT tu. Seperti biasa ambo keno bediri sebab seat penuh blako doh. Bising jugok la, masing-masing berbual hal sendiri. Ambo nga captain ambo senyap jah, mugo letih doh. Tibo-tibo berlaku sesuatu di hujung gerabak.

"eeeeeeekkk, eeeeeekk," kedengaran wanita menjerit.

"woughhh, oohppss, ohppss", hok jatae pulok, nnepik jugok sbenarnyo, tapi control macho.

Semo oghe dalae MRT kelih di hujung gerabak. Napok ado oghe dok melompat-lompat. Oghe hok melompat dan menjerit tu bukae satu tempat jah, tapi makin lamo makin dekat nga ambo. Ambo pong jenguk la ppalo jugok nok kelih ado gapo. Kelih-kelih, ado sekor lipas dok meluru ke arah kaki ambo.

Ambo pong angkat kaki (hujung kaki jah, tumit tok angkat), nyekkkkk, tijok mapuh keras.

Apa yang berlaku selepas tu sangat lah awkward. Ramai oghe pakat tepuk tange adik kakok weh! Wanita-wanita hok dok nnepik tadi semo dok "waaahh, waaahh", sambil kelih ko ambo, senyum-senyum. Husbands and boyfriends pakat hangguk ppalo ko ambo, signs of their approval of my action.

Tapi pokcik mokcik adik kakok abe abe, ambo maso tu ,raso sakit hati ado la! Tok tahu bakpo sero gere sunggoh. Aku tijok lipas jah weiiii. Bukae nyo ambo mene gusti nga singo. Tok payoh la nok mengagungkan ambo ni. Kalu pakat kato ambo hero sebab ambo tijok lipas, sero supo keno bbodo pulok.

Menate sunggoh la lipas ni. Tobak ambo nok bunuh semo lipas doh lepah ni. Wojik eh.

Tuesday, June 8, 2010

Mop

Assalamualaikum pokcik mokcik adik kakok abe abe...

Aloh letih weh dok tido spital 2 malae doh. Ambo nyo kelik kkapung, ado bekwoh besar. Bekwoh nyo tengoh hari klik-klik sapa malae buto. Panas lagi, oghe rama lagi. Deme la anok ambo. Wok gi spital, dokto kato molek masuk wad duluh, kelih lagu mano. Ni nok tubek doh ni. Bele-bele tunggu nok tubek, dae lagi blogging. Aloh parok sngoti...

Gak maso dok di KBMC ni, rama la worih mari melawat. Puah nunggu anok, bbual nga worih. Banyok cerito jugok la. Ado la satu kesoh mok sedaro ambo hok ambo nok ssuko. Pendek jah cerito nyoh. Maso dok bbual tu, ado mokcik cleaner mari mop lantai.

Kato nyo mok sedaro ambo, nenek beloh suami dio tuo doh. Oghe panggil "mok". Mok ni, tuo benar lah. Mato tok berapo napok, telingo tok berapo dengar. Banyok kkaro keno oghe tulong, jadi upoh la duo pembantu rumoh. Duo pembantu rumoh ni sokmo keno maroh ko Mok. Mugo Mok nyo tuo, mudoh bekeng.

Ado satu hari tu, pembantu rumoh tu keno mop lantai dapur. Duo-duo malas nok mop. Jadi bbaloh la duo tuh, "Mung la mop nyoh, aku sapu lluar", soghe tu kato. Pah soghe balas lagi, "Wok aloh, mung la nyoh mop!".

"Mung la, malas aku nok mop"

"Mung la mop"

Dengar ko Mok perbalahan duo oghe tuh. Kato nyo dio, "Takdok kijo-ae laing lah tuh, dok ngupak hal aku la tuh! Mung dok ngato gapo gak kak ku?!"

Hehe. Oghe kato "mop" dio dengar "mok". Suko jugok dengar cerito oghe tuo nih. Hilae puah. Tu jah cerito dio, pendek jah. Takdok modal nok bbobe loni. Kutip abih cerito oghe, gi jajo satu negaro. Ambo nyo pulok, sedak dok suko ko oghe tuo. Diri sediri ni duo kali limo jugok telingo. Ado oghe sebut namo, dok ingat dio nok ngorat nga kito.....