Wednesday, June 27, 2012

nate anying gilo...

Assalamualaikum pokcik mokcik adik kakok abe abe...

Seperti yang dijanjikan, ni cerito ambo keno hambat ko menate hanying. Sekali lagi ambo nok peringat ko adik kakok, post ni banyok nyupoh. Sebab sambil ambo nok ssapa cerito ni, ambo nok melepaskan geram ambo keno hambat. Nok cari anying tu nok katok mapuh tapi tok jjupo doh.

Ambo sejak kebelakangan ni meme amal gaya hidup sihat. Pagi-pagi lepah subuh ambo hungga sikit-sikit. Letih hungga, ambo jogging. Letih jogging, jalae kaki. Sokmo nyo hungga 5 minit, jogging 10 minit pah jalae kaki 30 minit. Pah oyak ko oghe ambo buleh hungga 45 minit. Blawok sunggoh, deh?

Jadi al-kisahnya, suatu pagi tu ambo hungga di kawasan perumahan dekat apartment ambo. Sokmo nyo hungga dekat taman permainan jah tapi hari tu ambo raso "adventurous" sikit. Tapi sapa loni ambo nyesal gi lari ssitu. Sapa di satu lorong perumahan tu, ambo pong kona la masuk lorong tu. Di satu sudut pandangan mato ambo, ado anying besar dok bowoh van putih. Kami bertentang mata...

Anying ni, adik kakok, pantang kalu kelih manusio berlari. Kalu kito jalae buat tok tahu, takpo. Tapi kalu kito dok hungga, mesti dio nok hambat. Ouhhhhh derassss ambo lari pagi tu adik kakokkkkk! Maso tu ado jugok terlintas di fikiran ambo, nok jerkoh ko, nok lari? Ado jugok anying hok konon bekeng tapi jerkoh skali, senyap ttipah.

Tapi kalu dio tidok takut ambo jerkoh, lagu mano? Hayun kaki nok sepak pon, takdok pasal-pasal keno kekoh di buku lali. Jadi ambo ambil keputusan untuk lari. Kecik-kecik dulu ambo ingat nasihat ayoh ambo, "oghe tuo kato kalu keno hambat ko anying, baco ayat Tabbat yada". Aiiii, jolo ko anying takut ko 'Tabbat yada'. Pah, maso hungga tok kae nok nnepik,

TABBAT YADAAAA ABEE LAHABIN WATAB!!!

Bukae ambo nok perkecilkan ayat suci al-Quran, tapi tok silap ambo surah tu cerito Abu Lahab keno seksa. Tok tahu lah apo kaitan nga anying. Di sebabkan ambo ragu-ragu jadi ambo baco jugok la dalae hati. Tapi tidok la sapa nnepik ayat tu kuat-kuat..

Belum sempat ambo habih baco ayat tu, ambo napok ado satu kereta ni parking tepi jalae. Ambo tok ingat kereta ggapo tapi bonet dio rendoh, bumbung dio tinggi. Ambo pong lopat sekuat hati naik atah bonet pah ukah atah bumbung kereto tuh. Anying tu dok nyalok dari bowoh. Doh anying tu tokleh mari dekat ko ambo, tok ingat abih doh laaaa ayat-ayat suci. Sakni malu nok nnepik ayat suci, tapi nok nnepik supoh seranoh ko anying takpo pulok.

Habih tubik segalo perkataan supoh dari mulut ambo. "Nate hanying gilo baso babi nate hanying ni bodo takdok otok baso gilo cih menate lutong hudoh..." ambo ssero seumur hidup ambo tok rajin lagi ambo nyupoh sebanyok maso tu. Demo raso ado effect dok di anying tu? Takdok pong. Dok nyalok supo anying gilo jah la. Maso tu pulok awal pagi, pukol 7 kot, jadi kereta hok lalu pong sikit.

Ado mokcik bowok kereto lalu depe ambo. Dio tengok ambo dok atah bumbung kereto, doh la ambo ppeluh pela. Ambo tok ssaloh ko dio kalu dio pikir ambo oghe gilo. Lambai tu gak kito mitok tulong, tapi koho derah ado dio teke minyok. Ambo ssero 10 minit jugok la dok ccokoh ssitu. Pahtu anying tu pong gi. Terjun ambo dari bumbung kereto tu, dio napok ambo, pah mari hambat lagi!

Tapi kali ni jarok ambo nga dio jauh doh sikit jadi dio tok hambat lamo. Huiiiii lego maso tu adik kakok, raso supo terlepas dari tali hukuman tali gantung! Tapi maroh sunggoh ambo ko anying liar gilo tu. Pete tu ambo ado la gi cari nga kereto, kayu baseball menjadi peneman. Tapi panje umor anying tu, sapa ko hari ni ambo tok jjupo balik.

Mitok maaf bbanyok pencinta binatang, tapi kalu ambo jjupo tobat ambo katok mapuh.

8 comments:

Anonymous said...

haha..sakik peruk2 ambo baco..sedak2..ambo dlu prnh ugop kno ambak ko anying..meme perit gilo...!

Anonymous said...

hahaha..pat koho derah myk kketo tu lucu kkali..haha..

Anonymous said...

hahaha! weylok YH weh. bkpo gak malang skmonyo? tula glenya nk adventurous sgt. update skmo deh! =DD

Anonymous said...

kereta apa yang YH panjat tu? haha!

Syazwan Che Deraman said...

sie demo bos.

ambo tak rajing kena hambat lagi.

SEPHIA said...

Jengkoil. Nge anying jd cito haha

syakira _508 said...

HAHA aduh la sakik perut baco. Saloh gi bukok blog ni maso2 lagu ni (3.03 am) Tok ttido la jawabnyo duk suko pah ceroh. Part nyupoh tu lawok sekali. haha. Yh gak ehh.

Azwan Azib said...

Demo maye subuh dok pagi tu ?