hidup ko dok?

Assalamualaikum pokcik mokcik adik kakok abe abe...

Alhamdulillah. Lego sengoti. Anok ambo baru tubek hospital kemarin. Teruk nyo mutoh hari tu. Lemoh bena, hilae dekat 3kg berat dio. Tapi alhamdulillah semo doh. Tok tahu la dio makae ggapo. Doktor kato mungkin dio kutip makae hok celoh-celoh sofa, dok pong bowoh mejo.

Lepah tubek hospital tu, baru teringat semula episod berlaku sepanjang anok ambo sakit. Ado satu episod tu, maso tu tok la naka, tapi pikir balik loni, nok ssuko jugok. Maso jjadi tu pukul 3 pagi kot. Lewat benar doh la sapa dekat subuh pulok, anok ambo tok tido lagi. Bowok gi hospital, emergency. 5 minit jah tunggu, doktor pong check anok ambo.

Macae-macae lah soalae doktor, start sakit bilo, deme panas ko, mutoh tubek ggapo, saloh makae gapo. Ambo try jawab sebaik mungkin blako lah. Tapi, adik kakok, ambo pelik satu bendo jah. Semo jawapan ambo, doktor tu berinteraksi nga bini ambo. Ambo hok jawab, tapi doktor tengok ko bini ambo, dan menanyakan soalan berikut ko bini ambo.

"Helloooooo. Can you see me? I'm here... doc?".

Takdok la sapa ambo oyak lagu tu. Tapi dalae hati ambo, kato lagu tu la. Serupo ambo tok wujud. Eh eh eh, doktor niiiii. Mulo-mulo dio tanyo duo soalae, ambo jawab tapi dio buat supo bini ambo hok jawab. Pah soalae ke-4 supo jugok. Ke-5, masih supo ambo takdok ttepi. Kali ke-7, otok ambo start pikir pelik-pelik..

"aiiiii, aku ni mati doh ko tok tahu, eh? Ko hok belaku tadi tu bini ambo buat soghe semo, aku jah hok perasae ado ttepi dio. Banyok jah movie Hollywood lagu ni..."

Ah sudoh. Ado jugok nok ssuko. Tapi jauh di sudut hati, ado sedikit kalut, kalu lah benar-benar supo ambo pikir. Tapi, tokleh la nok gi cuit bini ambo maso tu. Kae hidup lagi, malu buat kijo pelik depe doktor. Sabar wokyoh, sabar. Habih doktor tanyo-tanyo, dio pong tubek.

"Sayang, awok napo sayo dok?", terus ambo shoot soalan cepu mas ko bini ambo.

"Ape bende awak merepek ni?", dio jawab, muko supo husband dio ni one big failure. Huiiiiiiii lego nyo ambo maso tuuuuuuu adik kakok!! Syukur alhamdulillah! Hidup lagi aku ni. Bengong sungguh pikir sakni. Tapi gak, doktor nyo satu, lain kali gak tengok la butir mato ambo nii...

Ni la. Banyok sangat tengok cerito Hollywood. Renung-renung kan, dan, Selamat Berpuasa!