Kuiz Kelate #2

Semelekommmmmmm gu kito towhhh!

Aloh. Bui salae mmolek gak sikiiiik.

Assalamualaikum pokcik mokcik, adik kakok abe-abe semo...

Ho, gitu ehh. Kae sedak dengar tuuuh.

Yak ppagi lagi ambo dok online tenet. Baco komen-komen di blog aviasi ambo hok nyawo-nyawo ikae. Biarlah hok tu tuh. Nok wak guano. Kito bukae poklih. Moklih pong dok jugok. Rakyat biaso jah. Dan pada hari ini, ambo nok jadi cikgu. Ok murid-muriiiiiiiiiiid? Kito blaja beberapa patah perkataan Kelate ok. Sapo tokse, angkat tangan, gi tubek, gi lah nok gi main berambat duduk gak.

Minggu lepas, pembantu penulis blog ni, Toh Puan Dianne, buat Kuiz Kelate. Dio ambik dari facebook. Ambo ado jugok buat kuiz tu. Tapi ado hok tidok setuju jugok la. "Momo" tu gapo wei? Kalu benar ado pong, meme tidok beso guno. Setuju? Tajuk post kali ni ialah Kuiz Kelate. Tajuk jah kuiz, tapi ambo bui penjelasan nga jawapan skali lah. Tok payoh pertikai lagi.

Q = question A = answer C = contoh

Q: Asal perkataan ni, dari bahaso Arab. Bat'uun. Lembab ertinya. Kok bahaso Kelate?
A: Betak. Sokmo nyo diikuti "kata penguat" nya, jadi lah Betak-wak.
C: "Panah hati la aku dok maing nga oghe betak-wak lagu ni gak"

Q: Dalam perlawanan bola, oghe Kelate femes nga 'tackle' istemewa nya. Gapo?
A: Cah keting. Keting adalah bahagian depan betis anda, yang keras, but it's not a bone.
C: "Adowwwww, nate ni cah ketingg! Ref, lagu ni, penati Ref!!

*notice that 'penalti' in Kelantan is not 'penalti'. Sebut mmolek. Takdok 'L'. Penati.

Q: Gaduh, kalau bahasa baku, maksudnya berlawan. Fight. Tapi kelate, maksud gapo?
A: Oghe putih kato 'in a hurry'. Atau bahasa baku, 'nak cepat'.
C: "Gaduh nok gi lah kuano ni pokcik?"

Q: Bahaso baku kato 'kenduri'. Tapi kelate ambik dari English words, 'big work'. Gedio?
A: Bekwoh.
C: "Abe, hujung minggu ni Kak Dah bekwoh anok dio nikoh, kito gi deh abe?"

Q: Kata penguat untuk berikut? : Putih, Hitam, Pahit, Manis, Panas, Sejuk
A: Seppo, Blengit, Lleper, Nneting, Kketok, Kketar
C1: "Jauh bezo bini nombo satu nga nombo duo. Hok tu hitae blengit, hok tu putih ssepo."
C2: "Sayur peria ambo beci bena sebab pahit lleper. Woh mokte ambo suko, manis nneting!"
C3: "Aloh laaaaa guano ya panas kketok hari nih. Tapi tido malae, sejuk kketar pulok."

Hoh, bo lah dulu deh. Ambo takdok idea mano nok blogging pong. Sajo jah, lepas gian, mugo tokleh nnulis doh di blog satu lagih. Tengoklah, dengan penutupan blog hok tu, mungkin ambo buleh tumpu banyok maso lagi ssinih. Tok janji tapi gak.