fish

Assalamualaikum pokcik mokcik adik kakok abe-abe..

Guano demo surut doh ko deme korea. Ambo sero doh, mesti gege lepah ambo buat post korea. Mugo ambo tahu meme ramai pembaca blog ambo ni gilo korea. Hari tu patut gi korea 16 haribule, tapi anok ambo masuk wad. Alhamdulillah baik molek doh. InsyaAllah malae ni berlepas gi denu..

Kecek pasal anok daro ambo.. Umor dio loni 1 tahun setengoh. Cute sengoti la mek ni. Buleh doh sebut perkataan skit-skit. Kalu dio nok susu, dio sebut "ucuuuuuuu?" Pah bilo ambo bui botol susu ko dio, dio jawab "aceh ama". Aceh tu timo kasih, tapi sebab ambo sokmo jawab "sama-sama", dio pon satukan jadi aceh ama.

Satu lagi hok dio suko, fish. Lepah Asar gak ambo sokmo bowok dio gi tengok ikae. Dio kenal sangat lah kalu dok dalae air tu, fish la tu. Comel dio sebut. "Fiiiiiiiiiiiiish..." nada menaik maso sebut. Hari tu melawat sedaro mari KL di hotel. Naik la hotel, tingkat 20 lebih, tinggi. Maso ambo dok bbual, ambo dengar anok ambo sebut "fiiiiiiiiiiiiishhh.." Pelik la jugok sebab dalae bilik dio takdok akuarium.

"Mana ada fish sayang. Mana fish, mana?"

Demo tahu anok ambo tunjuk gapo? Dio tunjuk oghe ramai hok dok swimming di tingkat satu bowoh nuh. Aloh jange la jadi loyar buruk supo ayah sayang. Pah pagi tadi dio buat ambo tebohok lagi. OK cerito ni cemar skit baik demo jange baco kalu tokse mutoh. Stop sini ok ambo bui peluang ni.

.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.

Hok sene mutoh lari blako doh ko? Ok bagus. Loni anok ambo pandai mitok nok buang air besar doh. Jadi pagi tadi ambo pong letok dio di mangkuk toilet, keno pege dio sambil dio buat bisnes sebab takut jatuh. Sokmo nyo, dio lenggok tengok siling, tapi tadi dio kelih dalae mangkuk toilet.

Buleh dio kato "fiiiiiiiiiish.." bilo dio tengok hok napung tuh.

korea oh korea...

Assalamualaikum pokcik mokcik adik kakok abe-abe...

Hok wish ambo happy birthday, terimo kasih banyok-banyok ambo ucapkan. Terutama kepada co-blogger, HRH and IB. Demo tahu gapo ambo nok untuk birthday present? Ambo nok rambut putih. Tokse uban satu dua urat. Nok rambut mutiiiiih satu ppalo, oghe kato. Alang-alang koho tuo, baik tuo napok supo dato' dr. professor slaluh, ko guano?

Aaa jadi nyo adik kakok al-kisah pada kali ini adalah 'korea'. Mungkin ramai hok tok sedar, tapi demam korea melanda di malaysia loni adik kakok weh! Ambo kali pertama dengar lagu korea, bilo radio main lagu "Nobody", oleh Wondergirls. Lagu tu meme sedap, pah hok nyanyi tu pong hot. Aloh, tok kae demo tok tahu, hok nyanyi lagu

"I want, nobody nobody but you"....di ikuti duo kali tepukan.

Suatu hari ambo kelik kijo, sapa drumoh, tengok bini ambo dok tengok drama di TV. Dio kato dio beli DVD drama korea. Hah?? Drama korea? Ado subtitle ko? Ado. Wah, ini sudah maju. Skalo gak dok kelih drama melayu atau indonesia jah. Kalu kelih drama cino ambo pehe lagi. Tapi korea??

Lepah tu adik kakok, satuuuu satu pengaruh korea ambo sedar ado di malaysia. Ado jugok blog hok main lagu korea bilo bukok site. Tajuk blog pon bahaso korea. Bini ambo pulok, minat boy band dari korea! Nok jealous, taaaapiiii, ambo sediri telan air liur bilo tengok Wondergirls. Tapi ambo meme tok tehe sunggoh la bilo bini ambo 'burn' lagu korea di CD, pah main dalae kereto. Nyo ulae lagu tu sapa bengong ppalo-palo ambo. Ado satu lagu, tokleh nok tubek dari ppalo ambo...

Sorry Sorry Sorry Sorry
Naega naega naega meonjeo
Nege nege nege ppajyeo
Ppajyeo ppajyeo beoryeo baby

Tulongggg jugok tulong adik kakok weh, bakpo ya ambo dok dengaaar sokmo lagu tu dalae ppalo ambo nihh. Tokleh nok berenti gih band Super Juniors tu dok nyanyi di telingo ambo. Pagi sakni bangun, bukok jenelo, dengar burung berkicauan. Tok sapa 10 saat, lagu tu serang ambo lagi. Supo virus cancer hok degil, hatu sunggoh lagu tuh!!

Tapiii...ermmm...ado satu lagu boy band korea hok ambo suko. Ahaks, malu weh. Tapi demo try lagu dengar jugok ok. Ni video dio. Sangat lah jiwaaaaaangg...oh my oh my!

Oh, by the way, 16 haribule ni ambo, bini, dan anok insyaAllah akan gi bercuti. Setahun skali syarikat bui tiket free ko ambo sekeluarga, jadi bilo ambo tanyo bini ambo, tahun ni nok pakai tiket tu gi mano, dio jawab, nok gi negara...... (kalu demo berjaya teka, ambo ambik RM10 dari demo)

birthday pulok doh

cepat sungguh maso berlalu lloni dih.

selamat menyambut hari jadi lah encik yellowherbie kesayange kito semo. semoga panje umor muroh rezeki bertamboh anok lagi dan bertamboh idea nok menulis. amiin. besday ke berapo? mudo lagiiiii... hehe.

ikhlas dari HRH dan warga ketokurokuning sekalian. ;)

Mahal weih bungo

Ore kalu Valentine's gak kkalut laa blako beli bungo nyo. Pah mahal po cih pulok tu mugo time ni jah laa hok tok rajing beli bungo nok beli bungo pong. Kalu IB, baiklaa bui kasut ko. Dok pong kek. 

Ho speaking of cake, nih ado kek IB nok tunjuk nih. Namo dio Red Velvet. So lagi tu kek cakelat, sedak jugoklaa... Dari beli bungo baik beli kek. Bulih pakat makey.

Kalu bukey untuk Valentine's pong takpolaa, mugo kito bukey sambut pong. Tapi gak kalu bukey ado date ggitu pakat wak kupik blako nok bbeli present dih, dohla time besday pong keno Facebook hok remind. Kek ni anytime bulih beli, kalu IB free IB bulih wak. 

 

Ho guano? Tok terliur ko? Hiks. 

bakpo tok oyak?

Ni bukey nk challenge YH wat lawok tapi nok share jah sebab tadi juppo cerito ni HRH save daley bb, nok tulih daley blog lamo doh pah x teringak. Kejadian tahun lepah lagi maso HRH kelik KB. Adik HRH baru form 3 maso tu, gak at that age mano la sokmo gi bank atau tahu pasal urusey2 bank nih mugo buleh duit cash jah sokmo. Nok jadi cerito, hubby HRH nok wat tubik duit tapi tok breti maso lalu depey CIMB. Adik HRH pun oyak, "bakpo gi jauh?" Hubby HRH jawab, "sebab nak pegi Maybank. Abg tak bawak ATM card CIMB" Tapi adik HRH ni lurus bendul nyo oyak ginih..

"Oooh. bakpo tok oyak.. Adik ado jah kad CIMB ni. Abg Said buleh la paka dulu.."

MatSaleh gilo

Assalamualaikum pokcik mokcik adik kakok abe-abe...

Kito oghe melayu ni bersopan santun berbudi bahasa. Meme juruh sangat kalu nok banding nga oghe putih, atau dikenali juga sebagai mat saleh. Oghe putih ni, adik kakok, gura bewok tu biaso jah. Kito kalu gurau bewok nga saing-saing buleh la. Tapi acu kelih mat saleh, nga oghe hok dio tok kenal pong buleh buat lawok. Kito gak, kalu ado oghe hok tok kenal, tibo-tibo mari gurau bewok nga kito gak, buleh penapa tawar la.

Sebab tu kito tokleh buat rancangan "Just For Gags" dengan berjaya...

Ambo hari tu gi Perth, Australia. Turun rumoh pukol 6.30 pagi lagi, sapa hotel denu nok dekat pukol 5 doh. Ngatuk, letih, jadi ambo tido jenero ghaib sapa lepah isyak (solat buleh jamak). Bilo sedar, lapar perut la wei. Gi la cari dinner, maso tu pukol 10 lebih, kedai pong banyok tutup. Tapi ado satu kedai kebab halal bukok 24hours. Bilo masuk kedai tu, ambo soghe jah customer.

Tapau la kebab satu. Maso dok tunggu dio buat kebab, tibo-tibo ado mat saleh soghe masuk kedai tu. Umur dio 40 lebih gitu, gemuk skit, pendek-pendek. Pakai cap, sluar pendek. Nyok nyok nyok dio jalae masuk, gi dekat counter, tunding jari dio dekat tuan kedai, pah kato..

"YOU!! You'be been having fun with my wife behind my back, haven't you!!"

Mapuuuuuuuuuuuuuuuh aku kali ni, ambo kato dalae hati. Doh la sunyi, dalae kedai tu ado tuan kedai, ambo, nga matsaleh gilo tu jah. Bakpo laaaa aku dok siniiiiiiiiii, cari mapuh sengoti doh la akuuuuuu. Pahni nga aku aku keno semelih ko matsaleh jealous ni.

"I know every morning after I go to work, you come into my house through the back door!"

Pah dio jeling ko ambo! Sudoh doh la nyo tae ko matsaleh doh la aku kali ni. Ambo cubo sedaya upaya buat supo ambo tok wujud ssitu. Buat tok tahuuuuuuu jah. Nok lari, takut nyo hambat ko dio pulok. Tuan kedai pulok, adik kakok, buleh nyo sengih-sengih supo kero. Ambo nok tekecing dalae sluar doh.

"Haaaaaa, I gotcha mate! You're scared shitless aren't you, eh? C'mon man..." tibo-tibo mat saleh tu oyak ko ambo, pah hulur tange dio nok shake hand nga ambo. Terpinga-pinga la ambo! Ponamo rimau nih?? Ko ado camera dok shooting? Jatung ambo nok putuh doh, buleh nyo kato nyo buat lawok jah.

Tapi ambo shake hand jugok nga dio. Rupo-rupo dio saing tuan kedai, suko gurau bewok sokmo. Buleh la air Pepsi free satu tin sebab ambo sporting, kato tuan kedai.

Menate batokk sunggoh matsaleh aussie nih.

Askar Jepun..

Assalamualaikum pokcik mokcik adik kakok abe-abe...

Ambo raso di blog ni ado 2 ko 3 kali ambo tulih pasal oghe Jepun. Demo tahu deh, oghe Jepun ni bilo polite, polite telajok. Nyo tunduk jugok, nyo tunduk jugok. Nok patoh tekok-tekok kito dok bbadi tunduk nga dio.

Ambo baru gi Tokyo kemarin dulu. Ambo terbe balik Malaysia, bertolak dari Narita Airport pada suatu pagi yang agak dingin. Adalah menjadi tanggungjawab ambo, sebelum fly, ambo keno check keadaan pesawat. Check sayap, tayar, lampu, semo lah.

Jadi ambo pon turun tanggo kapalterbe nok gi bowoh. Maso turun tanggo ambo napok ado askar soghe dok jaga security sekeliling kapalterbe. Tuo jugok dio, ambo raso nok dekat pencen doh. Apobilo dio napok ambo turun tanggo, terus dio angkat lutut kanan, lalu "ttssssapppppppp!" rapat kemas keming kaki kanan pada kaki kiri. Pado maso samo, tange dio naik supo spring, lekat di dahi, tabik hormat.

Dalae hati ambo, "wow hebantnya aku di tabik sebegitu rupa". Daripado senang diri kepada bariiiiiis sedia, hanya kerana ambo. Airport lain takdok guard supo dio ni. So ambo pon balas la tabik dio (tabik nga duo jari, macho skit, hehe. sorry kak azah kalu pengakap meme keno sekeh palo aku). Pahtu ambo pong buat kijo ambo, check tayar, sayap, dan lain-lain. Habis check semo, ambo nok naik tanggo balik nok masuk pesawat.

30 minit berlalu, pesawat bersedia untuk berlepas. Askar tadi setia menunggu di hadapan pesawat. Slow-slow, trak penunda pesawat pong tolok la pesawat dari tempat parking. Maso tu jugok lah ambo nga captain napok guard tadi, tunduuuuuuuuuuk, tanda hormat dan bye-bye. Halamakkkkk, nok balas guano ni. Ambo nga captain duduk di seat pilot.

Tunduk hormat Jepun ni biaso nyo di buat bilo berdiri jah. Hok supo rukuk tu, tapi duo-duo tangan tepi badan. Tunduk hormat biaso nyo di balas nga tunduk jugok. Gak ambo nga captain duduk, jadi tokleh nok balas la. Buleh tu buleh, tapi pelik la, tunduk sambil duduk.

"Camne ni bro kita nak balas, takkan nak buat tak tau je?" captain tanyo ambo. Betul jugok. "Alah kita tunduk je lah bos", ambo kato.

Jadi supo oghe gilo lah ambo nga captain pagi tu, tetunduk-tunduk, tetunduk-tunduk, sambil tersengih-sengih supo cipan dalae cockpit pesawat.
Tunduk Jepun buleh buat maso bediri jah adik kakok Sebab lengan keno lurus nga badan. Acu try tunduk Jepun sambil duduk. Tidok ko pelik?