Thursday, August 11, 2011

kopi panas

Assalamualaikum pokcik mokcik adik kakok abe-abe..

Ambo baru kelik dari Auckland, New Zealand (NZ). Aloh laaaa makroh habiiih la poso ambo denu. NZ ni, adik kakok, nok oyak bui, jauh sangat-sangat ke timur. Demo tahu deh, kalu di Sabah, pukol 6.30 bbuko poso doh. Kalu di NZ? Haaaa, denu gak, pukul 1.30 tengahari bbuko doh. Tapi 1.30 tu waktu KL, waktu sano 5.30. Bezo 4 jam.

Gak butir mato ambo ni tido ikut waktu KL. Jetlag oghe kato. Jadi tido punyo tido, pukol 3.30 pete baru nok baaanguuuunnn. Tunggu 2 jam, matohari pon tuuuruuunnnn. Duo hari dok lagu tu. Makruh habih poso..

Hari tu ambo bbuko poso nga milo ais. Kecek pasal milo ais, teringat milo panas. Kecek pasal milo panas, teringat kopi panas. Kecek pasal kopi panas, teringat alkisah kebengongan ambo maso mudo-mudo dulu. Loni pong mudo lagi tapi 6 tahun lepas, lagi mudo dari lloni.

Ambo dulu lepas grad training bowok kapaterbe kipas, start la training bowok kapalterbe jet pulok. Ado skali tu, ambo ditugaskan untuk bowok balik satu pesawat ni dari KK balik KL. Tapi dari KL, gi ko KK jadi passenger jah. Suko lah hati ni, tengok-tengok di tiket, compani bagi seat first class.

Tu kali pertamo ambo duduk first class seumur hidup. Budok umor 19 tahun dok first class, excited lah. Setengoh jam terbe, stewardess pong mari tanyo ambo nok minum air ggapo.

"Errr. Ntah. Kopi O' je lah"
"Panas?"
"A'ah".

3 minit, kopi O' panas pong dihidangkan atas piring. Ambo pong minum. Adusss, panas weh kopi nih. So ambo pong buat la supo semo budok kecik buat bilo air dalae cawae panas telajok. Tahu dok ambo buat guano? Mesti la tuang kopi ke atas piring kan? Jange dok nnipu mesti demo rajeng kecik-kecik dulu buat lagu tu. Dan ambo start hirup kopi panas dari piring..

'sshhruuuppppp shhruuupppp shhruuuppppp'.

Bulat mato-mato oghe sekeliling ambo la weh! Gilo apo budok ni minum air lagu ni nih? Mat salleh jeling sapa juling mato mato. Stewardess lambat sikit napok ambo minum lagu tu. Tapi bilo dio perase ambo hirup di piring, cepat-cepat dio mari ko ambo.

"eh you, kat sini tak boleh minum camtu", tajae molek mato hitae dio kelih ko ambo.
"oh, ye ke. alamak, sorry ye".

Maso tu baru ambo sedar oghe pakat kelih ko ambo. Laa, bakpo pulok. Saloh ggapo hirup air panas dari piring nyo. Mat saleh tok rajeng buat ko lagu tu? Ooo. Hmm. Sorry lah. Tapi takdok oghe ajar pong ambo tokleh hirup ggitu maso training pong.

13 comments:

Faiz Nasir said...

olololololo, innocentnyo abe ewin, ahhahaa, coool gilo

Wild Cherry said...

hahaha WC dulu pon abah WC buat mcm tu gak bile minum air panas2... hehehe

ila ni said...

sungguh eh tokleh hirup gitu kat 1st class? toksey ah beli teket 1st class ko anok kecik pahni kohkohkohh

Nuuha said...

comey molek YH wak gitu... sayo gak sapa loni pung minung dalae piring lagih(tapi dumoh jah la) kalu air tu panah dooh..

H o'SHoPPe said...

cute sgt2 ahahahaha

KV said...

anok ambo ambo ajar minum lagu tu jugok

Anonymous said...

hahahahahaha..meme teringat sunggoh ko zamey2 mudo dulu

adilah said...

lucu lucu....

YH, buwe la word verification nk komen blog ni

yellowherbie said...

faiz nasir - innocent ko cool ni? innocent is not cool! :p

WC - dulu jah? loni tok buat doh ko? jgn lupakan adat, hehe.

ila ni - 1st class buleh jah minum ggitu, tapi ambo kae airline staff, oghe tahu blako, malu wak ggitu. kalu bukae staff, nok pakai singlet nga sluar pendek slipar jepun pong takpo.

nuufiiz / lepakplace - comey ko. hehe, buleh ko wak ggitu untuk ngorat. nati girls kato, oh he's so cute!

KV - bagus! teruskan adat!

anonymous - zamey loni pong buleh jah wak lagu tu, sila jangan malu2.

adilah - sory nnyusoh, tok perasae. ok ambo bueae.

hanis hazwani said...

ahahah..ok.dats funny.=D

eZaT eLaNo said...

hahahhaa..tobat lucu..jamey budok sokmo dh wat gtu..haha

crazee_tangerine said...

kiut! XD

Anonymous said...

kikikik...selamber!