Hatu lagi

Assalamualaikum pokcik mokcik adik kakok abe abe...

Ha, ni ambo ado cerito hatu lagih. Takpo ni bulae Ramadhan, syaitan nga iblis keno ikat blako, jadi cerito hatu pon tok takut la. Yo ko? Pahtuh, kalu masuk hutae, mulut buleh celupar la? Jange deh. Syaitan dan makhluk halus ni berbeza. Makhluk halus tok keno ikat bulae poso ni.

Ok ok, bui tazkiroh pulok doh. Sakni kato nok cerito hatu. Cerito hatu kali ni, adik kakok, tidok la pelik sangat. Mungkin ramai la antara demo, hok rajeng dengar cerito ni pong. Jadi jange ssaloh ko ambo kalu demo dengar doh cerito ni puluh juto kali. Mugo ambo baru dengar tu gak, ambo pong nok cerito la.

Dulu wife ambo blaja di UIA Gombak. Situ kae dekat nga hutae-hutae (hehe, pembaco blog hok blaja UIA jange maroh deh, bulae poso kae ni). Jadi banyok la cerito "menarik". Bagus jugok, lepas dengar cerito menarik gini, buleh la budok UIA study sapa subuh, tok payoh kopi pong takpo, meme tidok ngatuk mato. Ok ok, bbobe lagi ambo ni, cerito tu tok start-start lagi. Jadi begini....

Satu malae tu, ado student ni (perempuan), gi study di bilik prep. Maso tu dekat rayo cino, jadi ramai la student balik kampung. Sunyi jugok la bilik prep tu. Tapi dio kuatkan semangat jugok, dio nok perabih assignment. Masuk la dio dalae bilik prep tu. Bilik tu tidok la luas sangat, ado la buleh muat 30 students. Size standard bilik kuliah gitu.

Malae tu, dio jah student hok study di bilik tu. Sunyi. Tapi lego hati dio, tidok sapa pong 5 minit, ado soghe lagi student masuk bilik tu. Siapa? Saing baik dio. Molek benar lah. Puah-puah study, buleh bual-bual jugok deh? Fine. 60 minit masa berlalu. Otok pong tepu.

"Apsal ko tak balik kampung?"

"Aku nak saving skit"

"Ooo. Ko dah siap assignment yang Encik Zul bagi tu?"

"Dah"

"Oooo. So ko tengah buat assignment apa pulak tu?"

"Tengah kemas note je"

Belebokkkkkkkkkkkkkk, kotak pensil dio tibo-tibo jatuh dari mejo. Rancak berbual, kotak pensil di hujung mejo pon tok perasae nok jatuh. Biasa lah, ralit sangat. Dio pong tunduk nok ambik kotak pensil dio hok jatuh bertaburan. Maso dio tunduk di bowoh mejo tu, kelih kelih, saing dio hok depae mejo dio tu, eeeeeeeeeeeeee....takdok kakiiiii adik kakok weiiiiiiiiiiii!!!!

Dio pong baco macae-macae, ngucap banyok-banyok, istighfar banyok-banyok. Slow-slow, dengan terketar-ketar, dio bagun balik, mengadap sekali lagi saing dio. Saing dio tidok la bertukar menjadi hantu yang berwajah hodoh dengan gigi menyeringai dan berdarah. Tapi saing dio normal jah. Apa lagi, dio pong start la kemas kertas nga buku-buku dio, nok blah cepat-cepat la. Masih lagi saing dio tetap menulis nota.

Dio pong tubik bilik tu cepat-cepat. Dio takut reboh beleping sebab ketakutan telajok. Baik dio cabut, sebelom saing dio yang tidak berkaki itu menukar fikiran untuk merubah rupa. Dan, sebaik sahajo dio melangkah keluar dari bilik itu, dia dengar saing dio berkata,

"Apsal, dah tahu ker?"

Terawih

Demo rajeng dok maso terawih....

Baruuuuu jah imam abih al fatihah, baco sedap-sedap, demo khusyuk, ramai-ramai makmun "Aaaaaamiiiiiin"....

Imam pong baco surah berikut....Demo khusyuk ikut bacaan dio...

Tibo-tibo...

Pokcik sebeloh demo "uuuuurrrrrppppp" sedawo, tubek habih bau nasik goreng lauk ayae meroh sambal petai hok bbuko poso. Gas air 100 plus pong demo buleh cam di hujung bauan sedawo dio. Habih sedawo, siap hembus supo hembusan nafas terakhir lagih. Panje molek...

Mmmmm. Mokasih pokcik.

Peranchis

Assalamualaikum pokcik mokcik adik kakok abe abe...

Gege doh di shoutbox suruh ambo update. Ambo nyo malas. Ambo ngaku ambo kurae blogging doh sejak kebelakangan ni. Mitok maaf lah kalu demo tertunggu-tunggu. Loni tok blogging di rumoh doh, tokde sunggoh-sunggoh nah adik kakok weh. Ni di Rome, outstation, baru ado maso.

Kemarin ambo mari Rome, flight pukol 11.45 malam. Pagi tu dok kkapung ambo lagi. Pukol 5 petae tuh baru mari KL. Ambo jjupo oghe Peranchis maso nok ambik flight mari KL...

Maso tu dok beratur nok masuk perut kapal. Dok dalae terowong hok sambung ko pintu kapal tu lah. Ambo dok dukung anok ambo maso tu. Pah dengar suara oghe ttino kecek bahaso Peranchis blakae ambo. Pah, ambo pong dengar dio kecek English, ambo dengar "ouuuh, so cute, so cute". Ambo pong pusing blakae, tengok dio senyum ko ambo, kato anok ambo cute.

"Merci beaucoup", ambo oyak ko dio. Makno dio terimo kasih, bahaso Peranchis.

Senyum pah ko telingo lah dio. Bokali suko sunggoh dio ado oghe kelate tahu bahaso dio. Acu pikir kalu kito oghe kelate gi negaro dio, tibo-tibo ado mokcik Peranchis kato "mokaseh bbanyok laaaa anok weiii".

Oghe Peranchis hok kato anok ambo cute tu pong ado anok jugok. Umur dio ambo raso 5 tahun kot. Anok dio senyum ko ambo, pahtu dio lambai-lambai ko anok ambo. Ambo pong duduk, supaya ambo samo tinggi nga dio. Ambo nok bagi anok dio sentuh anok ambo lah. Dio pong pege pipi anok ambo, gosok-gosok rambut. Ambo pong tanyo anok dio..

"comment tu t'appelle?", maksud dio nama awak siapa.

"viktoria", anok dio jawab.

Pokcik mokcik adik kakok abe abe, ambo ni bukae reti kecek Peranchis. Stakat terimo kasih nga sama awak siapa tu ambo tahu la, sebab ambo beso gi negara dio. Tapi gak adik kakok weh, lepas tuh, mokcik Peranchis tu pon kkejut beruk gih! Tokde apo-apo, dio bedil ambo dalae bahaso Peranchis!

"wow, vous pouvez vraiment parler français, vous pouvez? Comment avez-vous apprendre le français? Vous êtes le plus bel homme du monde!"

Sudoh kijo doh la mokcik ni kecek Peranchis nga aku doh laaaaaa. Ponamo rimau nyo bobel tok tahu, tapi lepas dio habih kecek dio kelih ko ambo, seolah-olah menanti jawapan dalae bahaso Peranchis jugokkk! Beraaaaaaaat, tok tahu nok jawab lagu mano doh la weh!

"Ermmm, heh heh heh... sorry mam all I know is merci beaucoup and comment tu t'appelle in your language", sengih-sengih ambo kato, malu tu gaaaak.

Tepuk dahi gih mokcik tuh. Bokali dio pong malu jugok. Ho la sapo suruh tanyo pelik-pelik. Tanggung laaa mokcik Peranchis tu ponggggg...

google translator