nawok sunat

Assalamualaikum pokcik mokcik adik kakok abe abe..

Ambo baru ado cerito nok tulih. Tu ya tok update lamo tu. Sebab takdok cerito. Tapi ni baru ado satu kesoh menarik, molek lah untuk hiburan, molek jugok untuk di jadikan teladan...

Ambo ni, as all of you know, bertugas sebagai juruterbang. Kijo pilot ni, demo tahu deh, keno la ado lesen. Lesen pilot ni keno renew setahun sekali. Lepas buat medical check up, keno gi Putrajaya untuk 'cop' lesen. Jadi apabilo gi pejabat kerajaan di Putrajaya tu, sokmo la jjupo saing-saing. Hari tu ambo jjupo senior ambo, dio hok mari tegur ambo.

Maso tu adik kakok, ambo dok tunggu nombor ambo. Dari jauh ambo napok saing ambo ni mari. Dio captain hok dulu fly samo airlines nga ambo, tapi telah berhijrah gi airlines kaler merah sikit. Dulu, ambo kenal dio pong gitu-gitu jah, tidok lah rapat sangat pong. Tapi ambo kelih dio mari dekat ambo, senyum lebar, dari jauh angkat tange nok shake hand nga ambo..

"Heyyyyy how are you bro, lama tak jumpa! Your dad sihat lagi? Dia banyak fly lagi ke, or dah retire?"

Terpinga-pinga ambo, ayoh ambo bukae kijo pilot adik kakok weh! Ssamad ni silap oghe doh lah. Tapi dio yakin, jadi ambo takdok pilihan lain. Nawok sunat sudoh. Layan jah la. Bukae ggapo, siye sunggoh ko dio, sebab senyum lebar gih dio shake hand nga ambo, erat molek dio genggam tange ambo, pahtu siap tepuk atas belake ambo lagi. Kalu ambo oyak dio silap oghe, tidok ko malu ko dio, lebih-lebih lagi gege doh dio kecek nga ambo sapa oghe pakat kelih..

"Errr, sihat, dia sihat je. Eh, you banyak fly mana skarang ni?", ambo try tukar topic konon.

"Macam biasa la, takkan tak tau. Eh kirim salam kat your dad ok. Dia ada kat rumah ke?"

Wok alohhhh, nok kecek pasal pok kito jugok! Doh la kito nnawok doh. Bokali dio baik benar nga ayoh ambo hok kijo "pilot" tu. Maso tu jugok laaa adik kakok, ado soghe lagi senior pilot masuk pejabat. Kami bertiga pong bersalaman lah.

"Yo, bro, you ingat dia ni kan, ayah dia yang veeeeery senior pilot kita dulu", dio oyak ko saing dio. Mapuh doh aku skali ni, ambo kato dalae hati. Situasi ni koho berat ni adik kakok. Bertambah la masalah ambo, apobilo saing dio tanyo,

"Oh ye ke? Sapa nama your father?"

Aaaaaaaaa suddddoh doh laaaahhhhhh! Sudoh sudoh sudoh sudoh sudddddohhhhhhh!!!! Eh, kalu demo dalae situasi ambo, demo buat lagu mano heh? Nok oyak dio ssaloh oghe? Pah sakni bakpo tok oyak awal-awal nyoh! Tu la mungggg, nok nawok sunat sangat. Tapi kalu oyak awal-awal tadi kae, malu senior ambo tu pulok. Dio pong satu, yakin bedo'oh! So, sapo namo ayoh ambo ni, nok nawok ggapo lagi? Dio ingat ayoh ambo sapo?

Ala, biasa la, zaman teknologi canggih ni sene jah nok wak lolok sibuk. Wak tubik handphone la. Handphone konon silent, tok ringing, tapi ado oghe call la kononnnn...

"Eh kejap captain, my wife called. Excuse me ye.."

Bini ambo jugok hok jadi penyelamat. Walapong dio tok tahu. Hm, lepah "kecek" nga bini ambo, ambo pong gi nnusuk di toilet slaluh la. Lari wei, lari. Agok-agok dio tukar topic doh, baru tubek toilet. Mujur duo oghe tu meme dok discuss pasal bendo lain doh maso ambo kecek nga dio smula. Tok ingat doh ko pok kito hok kijo pilot tuh.

Ko dio baru teringat ambo ni bukae anok pilot?

nate anying gilo...

Assalamualaikum pokcik mokcik adik kakok abe abe...

Seperti yang dijanjikan, ni cerito ambo keno hambat ko menate hanying. Sekali lagi ambo nok peringat ko adik kakok, post ni banyok nyupoh. Sebab sambil ambo nok ssapa cerito ni, ambo nok melepaskan geram ambo keno hambat. Nok cari anying tu nok katok mapuh tapi tok jjupo doh.

Ambo sejak kebelakangan ni meme amal gaya hidup sihat. Pagi-pagi lepah subuh ambo hungga sikit-sikit. Letih hungga, ambo jogging. Letih jogging, jalae kaki. Sokmo nyo hungga 5 minit, jogging 10 minit pah jalae kaki 30 minit. Pah oyak ko oghe ambo buleh hungga 45 minit. Blawok sunggoh, deh?

Jadi al-kisahnya, suatu pagi tu ambo hungga di kawasan perumahan dekat apartment ambo. Sokmo nyo hungga dekat taman permainan jah tapi hari tu ambo raso "adventurous" sikit. Tapi sapa loni ambo nyesal gi lari ssitu. Sapa di satu lorong perumahan tu, ambo pong kona la masuk lorong tu. Di satu sudut pandangan mato ambo, ado anying besar dok bowoh van putih. Kami bertentang mata...

Anying ni, adik kakok, pantang kalu kelih manusio berlari. Kalu kito jalae buat tok tahu, takpo. Tapi kalu kito dok hungga, mesti dio nok hambat. Ouhhhhh derassss ambo lari pagi tu adik kakokkkkk! Maso tu ado jugok terlintas di fikiran ambo, nok jerkoh ko, nok lari? Ado jugok anying hok konon bekeng tapi jerkoh skali, senyap ttipah.

Tapi kalu dio tidok takut ambo jerkoh, lagu mano? Hayun kaki nok sepak pon, takdok pasal-pasal keno kekoh di buku lali. Jadi ambo ambil keputusan untuk lari. Kecik-kecik dulu ambo ingat nasihat ayoh ambo, "oghe tuo kato kalu keno hambat ko anying, baco ayat Tabbat yada". Aiiii, jolo ko anying takut ko 'Tabbat yada'. Pah, maso hungga tok kae nok nnepik,

TABBAT YADAAAA ABEE LAHABIN WATAB!!!

Bukae ambo nok perkecilkan ayat suci al-Quran, tapi tok silap ambo surah tu cerito Abu Lahab keno seksa. Tok tahu lah apo kaitan nga anying. Di sebabkan ambo ragu-ragu jadi ambo baco jugok la dalae hati. Tapi tidok la sapa nnepik ayat tu kuat-kuat..

Belum sempat ambo habih baco ayat tu, ambo napok ado satu kereta ni parking tepi jalae. Ambo tok ingat kereta ggapo tapi bonet dio rendoh, bumbung dio tinggi. Ambo pong lopat sekuat hati naik atah bonet pah ukah atah bumbung kereto tuh. Anying tu dok nyalok dari bowoh. Doh anying tu tokleh mari dekat ko ambo, tok ingat abih doh laaaa ayat-ayat suci. Sakni malu nok nnepik ayat suci, tapi nok nnepik supoh seranoh ko anying takpo pulok.

Habih tubik segalo perkataan supoh dari mulut ambo. "Nate hanying gilo baso babi nate hanying ni bodo takdok otok baso gilo cih menate lutong hudoh..." ambo ssero seumur hidup ambo tok rajin lagi ambo nyupoh sebanyok maso tu. Demo raso ado effect dok di anying tu? Takdok pong. Dok nyalok supo anying gilo jah la. Maso tu pulok awal pagi, pukol 7 kot, jadi kereta hok lalu pong sikit.

Ado mokcik bowok kereto lalu depe ambo. Dio tengok ambo dok atah bumbung kereto, doh la ambo ppeluh pela. Ambo tok ssaloh ko dio kalu dio pikir ambo oghe gilo. Lambai tu gak kito mitok tulong, tapi koho derah ado dio teke minyok. Ambo ssero 10 minit jugok la dok ccokoh ssitu. Pahtu anying tu pong gi. Terjun ambo dari bumbung kereto tu, dio napok ambo, pah mari hambat lagi!

Tapi kali ni jarok ambo nga dio jauh doh sikit jadi dio tok hambat lamo. Huiiiii lego maso tu adik kakok, raso supo terlepas dari tali hukuman tali gantung! Tapi maroh sunggoh ambo ko anying liar gilo tu. Pete tu ambo ado la gi cari nga kereto, kayu baseball menjadi peneman. Tapi panje umor anying tu, sapa ko hari ni ambo tok jjupo balik.

Mitok maaf bbanyok pencinta binatang, tapi kalu ambo jjupo tobat ambo katok mapuh.

Tunggu sekejap

Assalamualaikum pokcik mokcik adik kakok abe abe...

Eh mitok maaf bbanyok deh lamo tok update. Laptop punoh. Nok update paka ipad tok reti. Ni paka handphone jah. Ado ko oghe update paka handphone? Susoh tahu dok. Ni pong bukae nok update sangat. Nok jenguk and nok oyak mitok maaf jah. Bukae senyap lamo sebab tokse blogging doh.

Nati ado laptop/PC ambo oyak satu cerito. Cerito ambo keno hambak. Keno hambak ko menate hanying. Nate sunggoh. Mitok maaf ambo nyupoh tapi murih sungguh nah ambo ko hanying gilo tu. Nok oyak awal-awal, cerito tu penuh nga nyupoh. Jadi adik-adik, sila tutup telinga bilo baco post tu. Eh, tutup telingo takdok guno. Tutup mato lah. Budok-budok tokleh baco. 18 NK. (nyupoh kuat).

Stay tuned. Sekian.

Kucing

Assalamualaikum pokcik mokcik adik kakok abe-abe..

Anda semua sehat blako? Ambo gak rindu suuuuungguh ko pokcik mokcik adik kakok abe abe readers blog ambo. Kiro post kali ni serupo Jejak Kasih lah, buleh? Alohlohlohlohloh sayae tu gak ambo ko demo demo. Ambo ni, adik kakok, meme tokleh stop lah blogging. Gatal tu gak jari jemari ambo duo tigo bulae ni. Gatal nok nnulih, bukae gatal kok mugo laing, haish!

Dulu ambo kato tokleh nnulih ngarut blogging doh. Ho la, maso tu kkejut kak loh adik kakok weh. Tapi ambo sebenar tidok la berniat nok tutup terus. Kiro nyo ambo nok 'lay low' semeta la. Ni lamo doh berlalu, ah, mapuh gi lah, aku nok start balik. Tok lamo lagi ambo mungkin kembalikan address lamo iaitu ketokurokuning. Ambo tukar jadi kurokuning tu sebab nok lay low la konon. Tapi ni start balik, elok lah jjadi ketokurokuning semula. Bilo? Bilo demo tok jjupo address kurokuning. Kalu takdok hok ni, try namo lamo ok sayang?

So, apa cer? Cer ambo? Banyok cer naka dan cer tolo ambo. Tapi kiro basi doh la, sebab ambo tok blog slaluh. Tapi pete sakni ado jugok la satu tragedi jjadi ko ambo. Tragedi tolo. Bakpo tolo? Gak baco lah nok tahu gak..

Ambo pete sakni ni adik kakok, gi jogging. Riadah skit. Ambo ni kurus jah tapi gak hudoh benar gih kalu tange halus perut bucit. Perut ambo tidok bucit, tapi kalu tidok hungga gak, bucit la. Ambo hungga keliling condo jah. Maso hungga tu adik kakok, ambo tengok budok soghe nih dok pege kucing. Budok jatae, umor ado la 5 tahun. Kemah keming dio pege kucing tu. Ambo biar jah. Next round, sapa tempat budok tu lagi. Masih pege kucing.

Ambo tengok nayo molek kucing tu. Dio khejung habih gheng gih nate kucing tuh. Tapi dio bukae niat nok wak nayo. Sebab sambil dio cekik tekok kucing tu, muko dio gesel nga muko kucing..

"mmmmm saaaaayang cat. Saaaaayang cat ni. Comel nyierrrr cat ni, saaaaayang sangat-sangat"

Cat nyo ssembul butir mato doh. Jjelir 2 inci doh lidoh cat. Aku sero tidok lamo lagi oksigen tok sapa ko otok cat ni. Ambo pong gi dekat budok tu. Kelih sekeliling, takdok pong oghe dewasa hok jago dio. Tapi biaso jah gini, sebab dalae condo.

"Err, dik, abang tengok kesian sangat kat cat adik ni. Sakit dia tu. Bagi abang jap boleh?", ambo oyak ko budok tu. Dio kelih ko ambo. Kkejut jugok napok muko dio, ado oghe tok kenal tibo-tibo mari tegur.

"Ini cat saye lah. Sukati saye lah. Nak bagi abang buat apa?", dio ttepik ko ambo. Ye adik kakok, ttepik.

Budok ni nok keno jetik kakku ni. Silap hari bulae aku bui nnipah sbutir baru tahu. Kecik-kecik panda nnepik ko oghe. Sabar, sabar. Bokali mok ayoh budok ni ajar dio nnepik kali ado strangers tegur. Ambo berlembut lagi...

"Dik, camni la, abang nak tengok cat adik lompat-lompat boleh?"

Kali ni dio dengar. Dio pong letok kucing tu atas rumput. Hoh, lepas tu gaaaak, lari celida la wei kucing tu. Lari supo tok cukup tanoh gih. Ho la mugo nok mapuh doh sakni keno cekik. Budok tu kelih ko ambo. Mato dio berair. Mulut dio tutup rapat. Ah sudoh doh la.

"Abang la ni! Tengok, cat saya dah lari. Abang la nni huaaaaaaaaaa!!!!", dio lari menuju lift condo.

Ambo, dengan penuh tanggung jawab nye, pon lari jugok ko blok ambo (blok lain). Mano ttahu pok budok tu oghe gedebe. Keno jetik telingo tok ppasa. Tobat ambo tokse lari keliling blok 30 hari.

Ado lagi?

Assalamualaikum pokcik mokcik adik kakok abe abe..

Ambo nok tahu sikit jah. Ado lagi ko hok mari di blog ambo hok telah pon bertukar alamat ni? Ramai lagi ko dok berharap? Ambo puah la kalu tok blogging. Tapi kae blogging kae nyo murih kokre pulok. Ngaaaaaano eh?

mungkin selamat tinggal

assalamualaikum pokcik mokcik adik kakok abe abe...

ambo ado raso tok sedap hati sikit. tok tahu lah, tapi blog ni sedikit sebanyak bui kesan pada kehidupan ambo. bagi hok kenal ambo benar-benar, demo mesti tahu blog lamo ambo. huuii gege blog tu sedunia. tapi disebabkan kegegeran (ado ko perkataan ni) itu jugok, blog itu mati. terpaksa dimatikan la. bendo ni adik kakok, kalu tok gege, tulih la nok tulih ggapo pong, takpo. tapi bilo gege, keno berhati-hati lah.

jadi, loni blog ni pong gege jugok. tidok la ambo hagah. banyok lagi blog lain hok "happening". tapi blog ni, mungkin buat oghe tok puah hati. mano ttahu, oghe hok perjuangkan bahasa baku, raso blog ambo mengajar bendo tok molek. ambo takut keno samae weh. dulu bilo amo start blogging bahaso kelate, tok rama tahu. tapi bilo ppakat tahu blako, banyok cerito timbul.

"sape YH?"
"apa dia tulis?"
"apa maksud semua tu?"
"boleh ke dia tulis tu? legal ke?"

mesti demo herae, bakpo buleh jjadi saloh pulok? sebenarnyo ambo pong pelik bakpo buleh saloh. satu jawapan ambo buleh bui, sebabnyo, blog ni ramai oghe baco. bilo ramai oghe baco, wojib ado hok tok puah hati. contoh, blog lamo ambo dulu. kalu oghe tok baco sangat, mesti oghe tok suruh tutup deh?

baru-baru ni, ambo terima emel dari pihak google/blogspot sendiri. katanya, satu post ambo, bertarikh sekitar 2009, dipertikai kan kebaikan nya. jadi post tersebut di remove kan. ambo tok ssero hati lasung, wojik eh. tapi ambo jjadi takut. sebabnyo, bilo google sediri hok delete post ambo, napok sangat ado oghe "besar" hok baco, follow, dan memerhati tindak tanduk ambo di alam cyber ni.

adik kakok, walapong ambo suko ngarut di blog ambo, anok bini ambo tetap keutamaan ambo. ambo mitok maaf bbanyok, tapi ambo sanggup tutup blog ni, daripada dunio anok bini ambo keno tutup. ambo nok mitok maaf sunggoh-sunggoh semo ayat-ayat ambo hok buat adik kakok teraso. ambo nok mitok maaf jugok kepada oghe hok complain kepada google. ambo tok kenal sapo, tapi ambo tok maroh lasung ko demo. mungkin untuk kebaikan ambo sendiri. kalu demo tok complain, sapo tahu, ambo mungkin keno samae di mahkamah.

jadi, ambo ingat nok berhenti disini dulu sebelum air ata menitis di keyboard ini. ohh! haha, dok eh. terima kasih kepada pembaca sekalian, pokcik mokcik adik kakok abe-abe, demo menceriakan hidup ambo sokmo! harap-harap, ado hok teruskan blogging bahaso kelate. banyok nasihat ambo nok bui kepada blogger bahaso kelate. antaranya, jange pekat sangat la, nati oghe tokse baco sangat. nasihat lain, tokde sangat.

blog ni ambo biar dulu seminggu duo, buleh la demo nok tanyo gapo-gapo dulu. hok buleh jawab, ambo jawab k. tunjuk ajar nok blogging bahaso kelate, insyAllah ambo pass kan..

ambo undur dulu. segala yang baik dari Allah, yang buruk dari ambo. wabillahitaufik walhidayah assalamualaikum warahmatullahi wabarakatuh

mengepek..

Assalamualaikum pokcik mokcik adik kakok abe abe..

Ambo ucap doh ko Selamat Hari Raya? Dok lagi? Sorry gu. Takpo deh, syawal kae 30 hari. Selamat Hari Raya Maaf Zahir Batin. Mitok maaf kalu ambo ado guris hati demo, mitok maaf jugok atas segala supoh seranoh ambo dalae blog ni. Tapi lepah ni ambo tetap menyupoh lagi. Haha.

Nate apo la.

Ambo ado tok puah hati sikit ni adik kakok. Bukae skali duo, tapi banyok kali, ado oghe oyak ko ambo pasal lagu Spongebob Squarepants, versi kelate. Hari tu adik ipar ambo post lirik tu di dinding facebook ambo. Sepupu ambo soghe tu siap print di kertas lagi, bui ko ambo suruh baco. Naka dio kato. Eh, ayoh ambo sendiri tanyo ambo, "tengok doh video di youtube budok-budok kelate dok nyanying lagu spongebob?"

Dalae ketigo-tigo kes, semo tok tahu ambo tulih. Bukae nok nyoho adik kakok, tapiiiiii, bilo lagu tu koho gege, ambo keno la claim slaluh. Takut nyo lepah ni tubik di episod Senario ko, oghe wak modal Maharaja Lawak ko, sene ambo mitok royalti deh? Dok pong samae di mahkamoh sebab kes tiru. Koya dok ambo? Koya dok? Kalu tok koya tidok la ambo jjadi blogger mek wei..

Jadi lepah ni kalu oghe mari oyak ko demo pasal lagu tu, oyak slaluh, blogger hebat oghe kelate bowok keto kkuro, hok tulih lirik tuh. Nok tamboh "hok hensem supo Robert Pattinson" buleh jugok (alang-alang koya).

Baru-baru ni, genaplah 10 tahun tragedi keganasan teroris di US. Genap jugok 6 bulae sejak tsunami/gempa bumi di Jepun. Pasal teroris ambo tokse ulas sangat, maso jjadi tu, ambo form 5. Terus terang ambo ngaku, ambo tok kenal WTC sebelum tu. Kecek pasal gempa bumi pulok, ambo rajeng alami duo kali.

Kali Pertama:
Maso tu di Taiwan, sekitar pertengahan 2005. Ambo duk bbilik hotel, maso tu baru start kijo. Dok tengoh tengok TV tu, tibo-tibo bunying GUNG GUNG GUNG pah bilik ggegar sikit. Lari la kito tubik bilik. Tubik-tubik, mokcik cleaner dok vakum carpet, relaaaaax jah. Ambo kecek bahaso isyarat la ko dio,

"gepo boming mokcik, gepo boming wehh".

Tapi dio senyum jah, balas balik bahaso isyarat, ambo pehe nyo dio kato,

"aloh daghak sangat budok penakut nih, ggepo stakat tu oghe buat ulit tido jah wehh. Gi masuk balik bilik mung nuh, kalu ggepo kuat lagi nati mokcik mari dukung mung turun bbowoh".

Kali Keduo:
Maso tu baru jjadi tragedi tsunami di Acheh. Ambo terbe gi Penang, tido ddenu malae tu. Ambo ingat nyo maso tu ambo nok telelap doh, di bilik hotel tingat 26 atau 27. Tibo-tibo, hanyuuuuuut raso supo dok llaut. Nyung nyung nyung nyung berayun ssero katil ambo. Koho lamo koho kuat. Bukok jah mato, tengok curtain bilik ambo dok jjoget kiri kanan. Aloh hatu doh laaaaahhhh, ambo pikir.

Pah ambo teringat mokcik di Taiwan dulu, baru tepikir gepo boming hok sengoti. Oh mokcik hero where are you, mari dukung ambo turun wehhh. Tapi dio takdok. Dio mesti dok di Taiwan lagi. Ambo pong lari tubik bilik, kelih-kelih tetamu hotel lain pakat lari gi tangga kecemasan blako.

Ikut serta lah ambo, turun ikut tanggo dari tingkat 26. Sapa tingkat 16 ambo ssero, ambo pong mengoh. Jadi ambo bereti semetar, pah bukok pintu dari tangga kecemasan, masuk area bilik tetamu balik. Sunyi. Takdok oghe doh. Pakat lari turun kot. Lift napok tok ggerok jugok, takdok oghe guno kot.

Ambo pong teke butang turun. Try jah. Tibo-tibo, "tinggggg", bunying loceng lift, pintu pong tebuko. Ambo masuk, teke "G", tok sapa seminit kemudian, sapa bbowoh. Selamat alhamdulillah jah!

Gong dok ambo?