Eh, sapo doh dio tu?

Assalamualaikum pokcik mokcik adik kakok abe abe....

Demo tahu dok bahayo internet? Ado oghe ni, dio ngepek di facebook, dio maroh ko oghe Sarawak. Bukae dio buat post kutuk oghe Sarawak, tapi simply tulis comment that Sarawakians ni dok dalae hutan la, bla bla bla. Gege abih la wei. Jadi fenomena lepah tu. Ambo tokleh imagine ngano kalu dio betul-betul 'shoutout' di wall dio. Even worse, kalu dio ado blog and buat entry khas pasal oghe Sarawak. Ado blogger ni, jadi femes sebab buat post pasal oghe hok kutuk Sarawakian di facebook tu.

Ambo raso kalu ambo tulis namo oghe tu, mesti blog ambo pong ramai baco. Sebab namo oghe tu hot di google loni. Sapa ado entri wikipedia, tapi keno delete doh. So be careful everyone.

OK everybody, cerita kali ini dari bonda ambo. Mummy ambo cerito ko ambo pasal arwah datuk ambo. Dio kato dulu, ado skali, arwah datuk ambo ni jupo saing lamo di market. Tapi dio tok ingat namo saing dio tu. Ingat ingat tok ingat. Tapi dio pasti, oghe tu meme saing dio. Memberani kan diri, arwah datuk ambo pong mendekati oghe tu.

So, berbual-bual la dio nga oghe tu. Not an easy conversation. Maklum lah, dio ingat muko jah. Namo tok ingat, malah tok ingat langsung info pasal oghe tu. Nok tanyo, malu. Buat-buat kenal lah. Mano ttahu, tubek topik hok buat dio ingat sapodio oghe tu.

"Lamo tok kkelih. Lah kuano demo loni?", tanyo arwah datuk ambo.

"Takdok eh, supo skalo jah."

"Dok eh, dok mmano loni? Anok-anok?"

"Dok mano lagi, dekat 30 tahun doh rumoh tu, nok pindoh bakpo. Anok kelik maso rrayo jah"

"Ohhh. Mari mmano nih? Bbeli gedio?"

"Takdok ehh, mari spital takdi, anok sedaro eksiden. Ni singgoh beli daging smeta"

Begitu lah lebih kurang konversasi arwoh datuk ambo nga saing lamo dio hok dio tok ingat gapo satu pong, melainkan muko hok supo rajeng kkelih. Tanyo tu gak dio, tapi tokleh jawapan hok dio nok jugok. Frust jugok la dio. 15 minit jugok soal selidik. Last-last dio pong give up. Nenek ambo maso tu pong abih bbeli doh.

"Yah weh, supo rajeng kkelih oghe tu deh. Sapo eh?", kato nyo dio ko nenek ambo.

"Sapo dio? Tok kenal eh kito. Muko jah supo biras Pokteh Mamat", kato nenek ambo.

"Ohhhh, yo laaaa. Biras Pokteh Mamat la tu dehh. Namo dio Hussin tidok?"

"Heihhhhh, bukae Hussin tuuuu. Hussin gak Yah kenal sangat laaaa. Oghe laing tuuuuh!"

"Astaghfirullahalaziiiiim. Ambo kecek panje jjelo doh nga dio Yah weh!

Makanan sedap-sedap

Assalamualaikum pokcik mokcik adik kakok abe-abe...

Aloh rindu wehhhhh KB!! Rindu kehindahan hijau sawah tepi rumoh ambo, rindu udaro segar kkapung ambo di Pulau Limo. Signboard tulisae jawi besar-besar pong ambo rindu. But most of all, ambo rindu tempat makae hok buat kito meleleh air liur just by thinking of them. Sini ambo nok list down tempat hok ambo suko makae. Tok semesti sohor, tapi ambo suko.

Nasi kukus Suriani - tepi stadium tu lahh. Tahu lah demo rajeng bbeli situ ko dok tapi bagi ambo, banyok banyok nasik kukus di Kelate, ssitu la hok sedak skali. RM4 sbungkus, poho ayae besar bok, kaloh poho ayae KFC.

Sup belut alah gi Tumpat - tok ingat namo kedai hok ni weh, lamo telajok tok gi etek. Belut dio masok sup pong sedak, goreng pong sedak, tapi goreng paprik paling ambo berehi.

Hoover - Betul-betul in KB. Oh well, sapo tok kenal restaurant ni bukae oghe KB lah kot. Breakfast with satay, yeahhhh. Tengahari lauk belana kokna. Gapo demo nok, ado blako.

Mee Pok Se - Alah gi Tumpat, lalu ghetok Sultan Yahya deh? Lepah ghetok tu gi stret, pah jupo roundbout, gi stret lagi. Kedai dio alek kiri jalae, less than 1km lepah roundbout. Mee sup dio buleh wak mato ambo juling. Boh air lado bbanyok, biar sapa mmulas perut pong.

Mee Kg. Pek - Asalnyo di Kampung Pek (alah gi Kuala Krai). Tapi loni di KB pong ado. Kalu demo gi airport dari KB, paka jalae mano eh? Jalan Pengkalann Chepa ko? Along jalae tu lah, ado di sebeloh kanae (if u're from KB). Mee sup and mee goreng dio sohor. Tapi mee Pok Se sedap lagi bagi ambo.

Cendol bomba - Ambo raso namo kedai cendol ni bukae Cendol Bomba. Tapi sebab kedai dio dok tepi bomba, hok dekat Restauran Yati tu lah. Jalan Long Yunus ko? Same road as Sekoloh Maher. Mesti ambo odar 2 atau 3 mangkuk. Oh, lakso penang dio pong sedap.

Sup Lido - Again, ambo tok sure namo kedai nih. Tapi meme ambo panggil sup Lido. Sebab? Sebab kedai dio blakae panggung Lido la. Demo tok tahu Lido mmano? Tepi sungai dekat Hankyu Jaya tuhh. Sup dio sedak. Tapi lagi sedap is daging and ayae bakar dio. Cicoh sos cili. Mmmmphh.

Tu jah hok ambo buleh pikir loni. Banyok lagi, tapi hok ambo sebut tadi hok ambo tokleh "miss" setiap kali kelik KB. Mungkin demo tok tahu or tok setuju, tapi tu hok ambo suko lah. Kalu demo ado kedai hok demo raso ambo keno try, tulong inform ambo deh. Nok gi etek.

Mokaseh.

Demo asal negri mano?

Demo oghe mmano?

Kelantan - Kelantanese
Sarawak - Sarawakian
Sabah - Sabahan
Perak - Perakian
Johor - Johorian
Selangor - Selangorian
Penang - Penangite
Kedah - Kedahan

Perlis - Perlisian (debatable)
Pahang - Pahangite (debatable)
Terengganu - Terengganuian? Terengganite?
Malacca - Malaccan?

Negeri Sembilan????

Nasib...

Assalamualaikum pokcik mokcik adik kakok abe abe...

Sebelom ambo mulo mengepek di pagi yang hening ini, ambo nok tunjuk gambar baby ambo sikit. Nok pecoh perut ambo tengok gambar nih...


Tok padae nga umor tuh Qisya, nok study menu di restoran supo buleh makae beriani kambing. Heyyyy koya sunggoh anok ambo. Susu tok cukup eh mek cewe? Mmmmuah. Ayah loves you.

Ok, tu bab baby montel ambo. Ni ambo nok complain sikit. Bakpo gak ambo kalu tunggu gapo-gapo, mesti lamo sokmo. Ambo dok condo mertua ambo di 3rd floor contoh. Kato lah ambo dari ground floor. Sapa di lobby lift, ambo tengok lift tu dok di tingkat "G". Acuuuuuu jah ambo nok picit suis lift, ehhhh, lift pong naiiiik. Tok cukup nga dio tinggal ambo, dio gi naik ambik ssamad hok dok di tingkat 21. Mok nenek sunggoh.

Pah kalu beratur. Tok kiro la beratur di bank ko, beratur di KFC ko, mano-mano lah. Sokmo sangat laaaaa ambo gi masuk lane hok slow skali. Ambo sero ambo pilih baris hok pendek skali doh. Kelih-kelih, the "single lady" hok depe ambo tu ado geng. Rupo-rupo nyo geng dio lambat sapa, jadi dio gi beratur dulu. Sakit aaaaaaati tu gaaaak kito nih.

Hok sakit ati lagi kalu kito hok dok beratur 43 minit doh nih, tibo-tibo dengar cashier tu kato "encik, cik, sila datang beratur sini". Meaning ado baris baru buko. Customer hok 1 kilometer blakae ambo tu lari supo tok cukup tanoh, nok hambat masuk queue baru. Yup, he got to the cashier first lah. Menyupohhh lagi dalae hati ambo.

Plaza Tolol? Eh, Plaza Tol. Hok tu satu lagi. Mestiiiiiiii mabo masuk lane paling slow. Kemarin masuk lane "Tambah Nilai Touch n Go". Biaso lah, lane ni meme slow sebab oghe bui duit nok topup kad masing-masing. Sabar tu gak ambo beratur. Tapi okay la, kereta-kereta semo gerok sedikit demi sedikit. Finally, ado sebutir kereta jah tinggal di depe ambo. Ambo next to berurus niaga. Imagine adik kakok, apobilo ambo keno tunggu dekat 10minit, sebab mokcik depe ambo tu tok jupo kad pulokkkkkk!

Tempat-tempat di Kelate

Assalamualaikum pokcik mokcik adik kakok abe-abe....

Mitok ma'ah bbanyok ambo tokde tange skit lately. Minggu lepah ambo kelik dari LA, ado jugok cuti 3 hari. Tapi kelik kkapung. Kelik denu mano ado maso nok cocoh laptop di dinding sangat. Wifi pong takdok. Pah kelik KL pagi ahad, mugo malae tu kijo doh.

Jadi kepada pembaca hok dok menanti post pasal LA di blog ambo hok satu lagi, sobar la deh. Dok tulis la ni, with love from paris lagi you...

Ni ado bendo nok oyak sikit ni. Kelik kelate hari tu, ambo dok baco signboard-signboard yang banyak di jalan-jalan raya. Namo tempat sano sini lah. Ambo tok tahu lah demo ado terpikir atau tidak sebelum ni, tapi namo-namo tempat di kelate, agak unik. Contoh nya?

Palikbang.

Adik kakok eh, Palikbang tu bukae namo asal weh. Ya sebenarnyo *Pelekbe. Tapi bilo kerajaan nok letok namo Pelekbe di peta, terpaksa lah di-baku-kan. Takdok menasio hok sebut Palikbang, kecuali oghe luar ataupun kalu masuk berita. Lagi? Ado lagi? Blana kokna lagi eh. Mari kita mengkaji beberapa tempat lain murid-murid.

Pintu Geng - Bilo demo tutup pintu kuat-kuat, bunyi guano? "Gae!" Jadi namo Geng tu bukae bermaksud gangster adik kakok weh. Geng tu bunyi yang dihasilkan apabilo pintu (besi kot) di hayun hempas. Tapi di signboard, paling sesuai, Pintu Geng lah.

Pendek - Haaaa, hok ni oghe kelate sediri pon ado hok tok tahu. Sebut bbetul. Sebutan dio tidak sama dengan sebutan "Pendek", lawan kepada "Panjang". Sebutan "Pen-" tu demo keno sebut seperti demo sebut "Pen-" dari perkataan "Pendiam". Sebutan "-dek" pula, seperti demo sebut "-dek" dari perkataan "adik".

Bachok - Takdok oghe kelate kato "ambo nok gi Bachok lepas ni". Sebab huruf B pada Bachok ada sabdu nya. "Ambo nok gi Bbachok lepas ni" adalah betul.

Gaal - Mitok tulong jange sebut Gaaaaaaal gitu. Ado duo huruf A bukan bermakna di panjangkan A tuh. Cara sebutan, Ga'al. Tapi ado some signboards hok tulis Ga'al pon. Bagus la.

Tu baru sikit. Contoh-contoh hok ambo mampu tulis la. Tok mampu nok tulis semo la, banyok sangat. Anyway, pasal Pelekbe tadi. Ado duo versi cerito asal usul Pelekbe. Versi pertama: Satu masa dulu, ado dua beradik sesat. Hari makin gelap, jadi si abang pon ajak adik dia solat. Di suruh adik nya azan. "Tapi adik tok panda bae (azan, atau bang)", kata si adik. "Aloh, bae la lagu mano pong", paksa si abang.

Lalu adik dio pon azan "Alif Ba Taaaaa, Alif Ba Taaaaa". Si abang pon terkejut, dan katanya, "Weh weh, pelik dio ni bae". Jadi la Pelekbe (Pelik-bae).

Now, that's just so mengarut isn't it?

confuse

Haha, first time update blog duo kali dalae satu hari...

Sebab pertama, ambo boring gilo dok di taipei. Tido cukup doh, jjalae rato doh, perut isi doh, TV takdok hok sedap. Sebab kedua, ambo tok sabar-sabar nok oyak cerito nih...

Sakni ambo naik lift dari lobby. Baru kelik jalae-jalae. Ambik lift dari lobby, naik ko tingkat 16. Bilik ambo di 1619. Pintu lift bukok, ambo pong tubek, nok gi ko bilik 1619 jauh jugok sebab bilik tu hujung skali. Jalae tu gak kito nyok nyok nyok sapa hujung.

Pahtu mmasuk keycard. Eh, tubek lapu meroh. Dio keno tubek lapu hijau baru buleh masuk. Lapu meroh maknonyo error lah. Beci benar gak kalu keno turun lobby balik nok tukar keycard. Ni mesti sebab keycard ambo dok ttepek nga handphone, so ado gangguan magnetic ko guano, sapa data dio jadi bengong abih.

Duo tigo kali ambo dok try. Last-last putus asa, so decide to go down lobby lah after all. Maso tu lah ambo ssedar, dekat pintu tu, takdok sign "Do Not Disturb" hok ambo letok seblom tubek bilik tadi. Kelih-kelih, ambo dok depe bilik 1319.

Confuse semetar. Pah baru terpikir, mesti bilo lift tebukok tadi ambo paka tubek jah, padahal lift baru sapa 13th floor. Huuuu, mujur laaa takdok oghe dalae bilik 1319. Kalu tidok mesti dio dengar ado someone dok try masuk, pah kalu dio gi buko pintu, tidok ko malu.

Ni la jadinyo dae nganguk gak.

eh ko kenal ni tak?

Assalamualaikum pokcik mokcik adik kakok abe abe....

Demo biaso dok dengar soalae tu? Tuuuu, soalae di tajuk post ni. "eh, ko kenal ni tak?" Biasonyo soalae ni oghe tanyo kito, apobilo kito baru nok kenal dio. Gini la contoh. Demo saing nga Samad Bin Abu. Pada suatu hari, Samad bin Abu kenalkan demo nga Musa Bin Daud.

Demo pong kecek la ko Musa Bin Daud. Demo oyak ko dio dulu-dulu demo skoloh di SMK Pintu Geng. Musa Bin Daud pong tekejut la. Dio kato ko demo, "eh, sayo ado kenal saing sayo ni, dio skoloh SMK Pintu Geng jugok!". Haa, lepas tu, mesti dio tanyo demo, kenal dok si polan bin si polan?

Atau dalae bahasa KL, "oh, ko skolah tu jugak ye. Ko kenal ni tak?"

Aloh berehi benar laaa oghe tanyo soalae tu ko ambo bilo ambo kato ambo kijo nga airline. Dok eh, ambo tok maroh. Cumo nok ssuko jah. Ingat pilot ni ado 100 jah ko. Hehe, 1200 beb. Tu pong airline ambo jah. Ado hok sapa tanyo ambo kenal dok pilot TUDM ni hok bowok pesawat Sukhoi. Bakpo demo ingat juruterbang se-Malaysia ni paka keto kkuro ko blako :p

Ala, gurau jerr. Ambo kato doh kae, ambo tok maroh. Kutuk pong dok. Cumo nok ssuko. Sebab ambo sendiri pong lagu tu jugok. Kalu ambo jupo oghe dari Kampung Beris Kubu Besar gak, mesti sero nok tanyo, kenal dok mamat itu ini. Padahal kampung tu ado beribu-ribu manusio. Pokcik mokcik, adik kakok dan abe abe, sbenarnyo sifat tu sifat semulajadi kito. Mesti sero nok tanyo.

Kadae-kadae bilo ambo baru berkenalan, saing baru ambo tu tersenyum bilo dio tahu ambo oghe Kelate. Bokali dio ado kenal oghe Kelate jugok. Mesti dio nok tanyo ambo, "kenal si dia ni tak, dia pon orang kelantan jugak". Adoyaiiiiiii.

Jadi hari tu ambo gi Mumbai. Dari hotel naik bas gi bbandar. Dalae bas tu ambo berkenalan nga duo oghe crew Afrika, kijo nga Kenya Airline. Aloh dalae hati ambo, gelepar gih nok tanyo dio "eh, mung nga Usain Bolt kenal satu sama lain dok?"

Padahal Usain Bolt tu asal Afrika pong tidok.